Petropavlda eki mas júrginshi kólik astyna tústi
PETROPAVL. QazAqparat – Petropavlda belgilenbegen jerden ótpek bolǵan eki júrginshini kólik qaǵyp, ekeýi de dene jaraqatyn aldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Petropavl qalasynyń 56 jastaǵy turǵyny Ýálıhanov jáne Hımenko kósheleriniń qıylysynda baǵdarshamnyń qyzyl túsine qaramaı joldan ótip ketpek bolǵan. Mas áıel kelip qalǵan kólikti baıqamaı, astyna túsip, saldarynan dene jaraqatyn aldy. Endi ol ákimshilik jaýapkershilikke tartylyp, 25 myńnan artyq teńge aıyppul tóleýi múmkin.
Sol kúni keshki saǵat 20.00-der shamasynda «Lada» avtokóligi Qyzyljar aýdanynyń 51 jastaǵy turǵynyn soqty. Bul júrginshi de mas kúıinde Petropavl qalasyndaǵy N.Nazarbaev kóshesin belgilenbegen jerden qıyp ótpek bolǵan. Dene jaraqatyn alǵan ol aýrýhanaǵa jetkizildi.
«Júrginshilerdiń kópshiligi jolda júrý tártibin saqtamaıdy. Jyl basynan 6 myń adamdy belgilenbegen jerden kósheni qıyp ótkeni úshin jazaǵa tarttyq. Jol qozǵalysynyń barlyq qatysýshylary ortaq jaýapkershilikti esten shyǵarmaýlary kerek. Jolda júrý erejelerinde jaıaý júrginshiniń de mindetteri kórsetilgen. Joldaǵy arnaıy belgilengen jerden qaýipsiz ekendigine kóz jetkizgennen keıin ǵana baryp ótý kerek», - deıdi SQO PD Jerglikti polıtsııa qyzmeti basqarmasy basshysynyń mindetin atqarýshy Grıgorıı Tysh.
Jalpy jyl basynan Petropavlda 49 júrginshini kólik qaǵyp, altaýy mert boldy.
