Petropavlda eki qyzdy qaǵyp ketken kúdikti shetel asyp ketti
PETROPAVL. QazAqparat - Petropavlda sot eki boıjetkendi qaǵyp ketti dep kúdikke ilingen júrgizýshini qamaýǵa alý túrindegi bultartpaý sharasyn sanktsııalady, dep habarlaıdy QazAqparat.
Oblystyq sot baspasóz qyzmetiniń aqparatynsha, 18 qyrkúıekte Petropavl qalalyq mamandandyrylǵan tergeý sotyna tergeýshiniń 27 jastaǵy kúdikti Ilıa Starýhınge qatysty qamaýǵa alý túrindegi bultartpaý sharasyn sanktsııalaý jóninde qala prokýrorymen kelisilgen ótinishi tústi.
Oǵan QR Qylmystyq kodeksiniń 345-baby («Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy») boıynsha qylmys jasady degen aıyp taǵylýda.
«18 qyrkúıekte Petropavl qalalyq mamandandyrylǵan tergeý soty Qazaqstan Respýblıkasynyń aýmaǵynan tysqaryda júrgen kúdiktige qatysty ótinishti qarady. Ótinish qanaǵattandyrylyp, eki aıǵa qamaýǵa alý túrindegi bultartpaý sharasy sanktsııalandy», - dep túsindirdi baspasóz qyzmetinen.
I. Starýhın Petropavl qalasynyń ortalyǵynda túngi klýbtyń mańynda eki qyzdy qaǵyp ketti dep kúdikke ilindi. Apat 15 qyrkúıek kúni tańerteń bolǵan. Ol oqıǵa ornynan izin sýytqan. Jol-kólik oqıǵasynan keıin eki boıjetken de aýrýhanaǵa aýyr halde tústi. Olardyń biri komada jatyr.
