Petropavlda eki adamnyń ólimine qatysty 54 jastaǵy kúdikti qamaýǵa alyndy
ASTANA. QazAqparat - Petropavl qalasynyń ІІB qyzmetkerleri erli-zaıypty eki adamnyń ólimine qatysty kúdiktini qamaýǵa aldy, dep habarlaıdy «QazAqparat» HAA tilshisi.
SQO ІІD baspasóz qyzmetiniń aqparatyna sáıkes, saıjaıda turatyn adamdardan erli-zaıypty kórshileriniń birneshe kún boıy kórinbeı ketkeni týraly habarlama túsken. Túngi ýaqytta shaǵym túsken úıge barǵan quqyq qorǵaýshylar 63 jastaǵy áıel men onyń 59 jastaǵy kúıeýiniń óli denesin tapqan.
«Alǵashqy satydaǵy jedel izdestirý sharalaryn júrgizý barysynda iz jasyryp úlgermegen 1962 jylǵy Petropavl qalasynyń turǵyny qolǵa tústi. Ol buryn da qylmystyq áreketi úshin zań aldynda jaýap bergen. Qaıtys bolǵan adamdardyń kórshisi bolǵan», - dep habarlaıdy Petropavl qalasy ІІB bastyǵynyń orynbasary polıtsııa polkovnıgi Asan Meıramov.
Polıtsııanyń habarlaýynsha, ustalǵannan keıin kúdikti kinásin birden moıyndaǵan. Eki adamdy óltirýiniń sebebi ózara kelispeýshilik bolǵan kórinedi. Eski qastyq eki adamnyń ólimine ákep soqqan.
Atalǵan jaǵdaı boıynsha QR QK 99-babyna sáıkes sotqa deıingi tergeý amaldary bastaldy. Kúdiktiniń kinási dáleldengen jaǵdaıda ol 15-ten 20 jylǵa deıin bas bostandyǵynan aıyrylýy múmkin.
