Petropavlda eki adam pnevmatıkalyq qarýdan jaraqat aldy
PETROPAVL. QazAqparat – Petropavlda eki er adam pnevmatıkalyq qarýdan abaısyzda jaraqat aldy, dep habarlaıdy QazAqparat tilshisi.
Soltústik Qazaqstan oblystyq polıtsııa departamenti baspasóz qyzmetiniń málimetinshe, 27 mamyr kúni túnde Petropavldaǵy jaraqat bólimshesine pnevmatıkalyq qarýdan jaraqat alǵan eki adam júgingen. Dárigerler olardyń denesine turyp qalǵan oqtardy alyp, úılerine jiberdi.
Petropavldyń krımınaldy polıtseıleri bul fakti boıynsha tergeý júrgizdi. Er adamdar «Borner» pnevmatıkalyq qarýyn ózderimen birge balyq aýlaýǵa ala barǵan. Olar qarý oqtalmaǵan dep oılaǵan.
«Kalıbri 4,5 mm aspaıtyn pnevmatıkalyq qarýdy tirkeýdiń qajeti joq. Alaıda kez-kelgen qarýdy abaılap qoldaný kerek. Bul oqıǵa soǵan dálel. Ol úshin qarýdy oqtaýly kúıi saqtaýǵa bolmaıdy. Adamǵa qaratýǵa jáne atatyn oıyń bolmasa saýsaqty shúrippege qoıýdyń qajeti joq. Oqys oqıǵalardyń aldyn alý úshin qarýdy saqtaý, alyp júrý, paıdalaný talaptaryn qatań saqtaǵan jón. Polıtseıler qarý ıelerin únemi tekserip, profılaktıkalyq is-sharalardy jıi ótkizip turady», - deıdi SQO PD ákimshilik polıtsııa basqarmasynyń erekshe tapsyrmalar boıynsha aǵa ınspektory Qurman Mýsın.
