Petropavlda eki jyl buryn qulaǵan murjanyń ornyna jańasy turǵyzyldy
PETROPAVL. KAZINFORM – Petropavl 2-JEO-da №1 tútin murjasy dińiniń qurylysy aıaqtaldy. Bul bul stansanyń ekologııalyq jáne tehnologııalyq kórsetkishterin jaqsartýǵa múmkindik beredi.
Bıyl mamyr aıynda «KazteploSPETsSTROI» JShS merdigerlik uıymymen shart jasalǵan. Qurylys konýstyq syrǵymaly qalyptardy qoldaný arqyly júrgizildi. Ázirleýshi jáne jetkizýshisi – Avstrııanyń «GLEITBAU G.M.B.H.» qosalqy merdiger uıymy. Úzdiksiz qurylysty qamtamasyz etý úshin 92 qyzmetker jumyldyryldy.
Jańa tútin murjasy konýstyq pishinde. Onyń dıametri –20,52 metr, joǵarǵy jaǵy – 9,2 metr, negizindegi murjanyń qalyńdyǵy – 800 mm, joǵary jaǵy – 250 mm. Konstrýktsııanyń bıiktigi – 180 metr. Bul 2-JEO jumys istep turǵan №2 jáne №3 murjalardan 30 metrge artyq. Dińdi turǵyzý úshin 3 300,6 m^3 aýyr beton jáne 1 217,1 m^3 jeńil beton, 530 tonna ártúrli dıametrdegi armatýra paıdalanyldy.
«5 tamyzda tútin murjasynyń dińi quıyldy, bekitilgen joba boıynsha 15 qarashada aıaqtaý josparlandy. Biraq 73 kúnde, bir aı erte bitirdik. Biz áli de kóp jumys atqarýymyz kerek. Qalyptardy bólshektegennen keıin qorǵanys qalpaqshasy, júretin baspaldaq, baǵdarsham alańshalary, qyltımalar, syrtqy jaryqtandyrý, naızaǵaıdan qorǵaý ornatylady», - deıdi «SEVQAZENERGO» AQ bas dırektory Anatolıı Kazanovskıı.
2025 jyly kúl jınalatyn úı-jaıdy ornatý boıynsha jumystar júrgiziletin bolady.
«Qazandyq agregattarynan gaz júrý jolyn keltirý kerek. Barlyq jumys aıaqtalǵan soń jańa tútin murjasyna qolda bar 12-inen stansanyń 7 qazandyq agregaty qosylatyn bolady. Sonymen qatar 2025 jyldyń qyrkúıek aıyna deıin № 1, 2, 3, 4, 5, 6 qazandyq agregaty qosylady. 2026 jyly jańa tútin murjasyna №7 qazandyq aýystyrylady, al №12 qazandyq №3 tútin murjasyna qosylady. Osylaısha, qazirgi tańda №2 tútin murjasynda jumys isteıtin barlyq qazandyq agregattary eki murjaǵa aýystyrylady. Osy jumystardy aıaqtap, 2026 jyly №2 tútin murjasyn bólshekteýdi josparlaımyz», - dep Anatolıı Kazanovskıı josparlarymen bólisti.
Jańa murjanyń shyǵarýlary men tehnıkalyq parametrlerin baqylaýdy qamtamasyz etý úshin onda avtomattandyrylǵan monıtorıng júıesi ornatylady. №1 tútin murjasy kelesi jyldyń qazan aıynyń basynda paıdalanýǵa beriledi.
