Petropavlda eki jyl buryn bostandyqqa shyqqan adam áıeldi zorlamaq boldy

Oqıǵa Petropavldaǵy Jumysshy kentinde kúndiz bolǵan. Belgisiz er adam 54 jastaǵy áıelge shabýyl jasap, oǵan qatysty jynystyq sıpattaǵy zorlyq-zombylyq jasaýǵa árekettengen. Alaıda áıel qarsylyq kórsetip, qolynan sytylyp shyǵyp, kóshede ótip bara jatqan adamdardan kómek suraǵan.

Soltústik Qazaqstan oblystyq polıtsııa departamenti baspasóz qyzmetiniń málimetinshe, tártip saqshylary jedel izdestirý is-sharalary barysynda kúdiktini izin sýytpaı anyqtap, ustady. Ol - oblys ortalyǵynyń 62 jastaǵy turǵyny. Qazirgi ýaqytta kúdikti ýaqytsha ustaý ızolıatoryna qamaldy.

- Oqıǵanyń barlyq mán-jaıyn jan-jaqty, tolyq ári obektıvti anyqtaýǵa baǵyttalǵan qajetti tergeý áreketteri júrgizilip jatyr. Tergeý barysy oblystyq polıtsııa departamenti basshylyǵynyń erekshe baqylaýynda. Tergeý múddesine baılanysty ózge aqparat jarııa etilmeıdi, - delingen baspasóz habarlamasynda.

Kúdikti buǵan deıin asa aýyr qylmystar: qaraqshylyq, óltirý qaterin tóndire otyryp, erekshe qatygezdikpen zorlaý, seksýaldyq zorlyq-zombylyq áreketti kámeletke tolmaǵan balaǵa qatysty jasaý úshin sottalǵan. Ol 1999 jylǵy 28 jeltoqsanda Soltústik Qazaqstan oblystyq sotynyń úkimimen birneshe aýyr jáne asa aýyr qylmys jasaǵany úshin 25 jylǵa bas bostandyǵynan aıyrylǵan.

Jazasyn tolyq ótegen er adam 2024 jylǵy 12 qańtarda №51 mekemesinen bosatylǵan. Keıin Aıyrtaý aýdandyq sotynyń 2023 jylǵy 27 qarashadaǵy qaýlysyna sáıkes oǵan sottylyǵy joıylǵanǵa deıin 8 jyl merzimge ákimshilik qadaǵalaý belgilengen.

Polıtseıler qazirgi ýaqytta qylmystyq is boıynsha tergeý jalǵasyp jatqanyn aıtyp, kúdiktiniń kinási sotta dáleldengenge deıin ol Qazaqstan Respýblıkasynyń zańnamasyna sáıkes kinásiz dep esepteletinin eskertti.

Buǵan deıin Almatyda turǵyn úı aýlasynda er adam balaǵa kúsh kórsetkenin jazǵan edik.