Petropavlda eki jasar bala terezeden qulap ketti

PETROPAVL. KAZINFORM — Petropavlda kóp qabatty úıdiń terezesinen qulaǵan bala aman qaldy.

Aldyn ala málimet boıynsha, eki jasar bala toǵyz qabatty úıdiń ekinshi qabattaǵy páterdiń terezesinen abaısyzda qulap ketken. Oqıǵa ornyna jedel járdem shaqyrylyp, búldirshin oblystyq kópbeıindi balalar aýrýhanasyna jetkizildi. 

Soltústik Qazaqstan oblystyq densaýlyq saqtaý basqarmasynyń málimetinshe, dárigerler balany tekserý barysynda onyń birneshe jaraqat alǵanyn anyqtady. Atap aıtqanda, bel omyrtqa bóliginiń baılamdary sozylǵan, oń jaq sany kógergen jáne oń aıaq tabany syrylǵan. 

— Qazir bala oblystyq kópbeıindi balalar aýrýhanasynyń travmatologııa jáne ortopedııa bóliminde. Naýqasqa qajetti medıtsınalyq kómek kórsetilip, emdeý konservatıvti tásilmen júrgizilip jatyr. Onyń ómirine qaýip joq, jaǵdaıy turaqty, — deıdi mamandar.

Buǵan deıin Astanada kópqabatty turǵyn úıden órt shyǵyp, úsh bala qaza tapqanyn jazǵan edik.