Petropavlda eki er adam avtomobıl qozǵaltqyshyn jýatyn suıyqtyqty abaısyzda iship qoıǵan

PETROPAVL. KAZINFORM — Petropavlda bir kúnde qozǵaltqysh jýatyn suıyqtyqty iship qoıyp, qatty ýlanǵan eki er adam aýrýhanaǵa tústi.

Dárigerler ekeýin de aman alyp qaldy.

Petropavl qalalyq kópbeıindi aýrýhananyń málimetinshe, ýlanǵan er adamnyń bireýi 62-de, ekinshisi 33-te. Olar tanys emes, qalanyń eki shaǵyn aýdanynda turady. Birinshisi bir jutym, ekinshisi eki jutym jasaǵan eken.

— Bizge túskende jaǵdaılary nashar boldy, tamaǵynyń, keýdesiniń qatty aýyrǵanyn aıtyp, júrekteri aınydy, qusty, álsizdik boldy. Hımııalyq suıyqtyq olardyń aýzyn, óńeshin, asqazanyn kúıdirgen, saldarynan isip, qabyný protsesi bastaldy. Tynys alýynyń toqtap qalý, ishke qan ketý jáne sepsıs qaýpi boldy. Ekeýine de bir dıagnoz: aýyr ýlaný, as qorytý joldarynyń hımııalyq kúıigi dıagnozy qoıyldy, — deıdi syrqattardyń ómiri úshin kúresken dárigerler.

Ekeýi de birden reanımatsııaǵa jatqyzyldy. Mamandar júrgizgen em-domnyń arqasynda eki syrqat ta 4-5 kúnnen keıin úılerine ketti.

— Biz olardy qutqaryp úlgerdik. Der kezinde jetkizilmegende múshelerdiń nekrozy, óńeshtiń nemese asqazannyń tesilýi, sepsıs, múgedektik nemese ólimmen aıaqtalar edi.
Osyndaı jaǵdaıǵa dýshar bolmas úshin hımııany sý turǵan bótelkege quımańyz. Syrtyna ne suıyqtyq ekenin jazyp qoıyńyz. Qaýipti zattardy balalar men qarttardyń qoly jetpeıtin jerde ustańyz. Al ýlanǵan jaǵdaıda birden jedel járdem shaqyryńyz, — deıdi dárigerler.

Buǵan deıin SQO-da ýchaskelik ınspektor er adamdy ólimnen qutqarǵanyn jazǵan edik.