Petropavlda eki aǵash pen elektr baǵany qulap, kósheni jabýǵa týra keldi
PETROPAVL. KAZINFORM – Petropavlda eki aǵash opyrylyp qulap, elektr jelisine zaqym keltirdi.
Oqıǵa tańerteń Partızan jáne Nursultan Nazarbaev kósheleriniń qıylysynda bolǵan. Ikomek-ke aldymen tártip saqshylary habarlaǵan. Qulaǵan aǵashtar joldy jaýyp qalǵandyqtan, polıtseıler kezekshilikke tartyldy.
SQO Tótenshe jaǵdaılar departamenti baspasóz qyzmetiniń málimetinshe, zardap shekkender, mert bolǵandar joq.
Aǵashtardyń qatty jelden qulaýy múmkin emes. «Qazgıdromet» kásiporny oblystyq fılıaly buǵan deıin bir táýlikke aýa raıy boljamyn jasap, taratty. Sınoptıkterdiń eskertýinde naızaǵaı oınap, jańbyr jaýatyndyǵy jáne tańerteń men túnde tuman túsetindigi aıtyldy. Al jeldiń ekpini kúndiz 15-20 m/s aspaıdy delingen.
Petropavl qalalyq ákimdigi turǵyn úı-kommýnaldyq sharýashylyǵy bóliminiń málimetinshe, eskirgen aǵashtardy jaqyn mańdaǵy kópqabatty úılerdiń turǵyndary kestirmegen.
- Oqıǵanyń negizgi sebebi - aǵashtardyń shirip, apatty jaǵdaıda bolýy. Bul jerde terekter men úıeńkiler ósip tur. Buǵan deıin olardyń joǵarǵy bóligi kesilgen edi. Syrty bútin bolǵanymen aǵashtardyń ishki shirý protsesinen, sańyraýqulaq pen aǵash zııankesteriniń áserinen tamyr júıesi men diń qurylymy álsiregen.
Saldarynan terek óz salmaǵyna shydamaı qulaǵan jáne janyndaǵy shirigen taǵy bir úıeńkini zaqymdaǵan. Sondaı-aq kóshe jaryǵynyń beton baǵanynyń búlinýine ákeldi, - deıdi dendrolog Tımýr Zverıachenko.
Buǵan deıin Kókshetaýda balabaqsha mańyndaǵy apatty jaǵdaıda turǵan kópir qulaǵanyn jazǵan edik.
