Petropavlda egiz boıjetken ustazdyq joldy tańdap, muǵalim bolyp júr
PETROPAVL. KAZINFORM — Soltústik Qazaqstan oblysyndaǵy mektepterde muǵalim bolyp eńbek etip júrgen egizderdiń ázirge bir ǵana juby bar.
Aıkúmis, Jankúmis Ermekpaı Petropavldaǵy jalpy bilim beretin № 29 mektepte bastaýysh synypta sabaq beredi. Egizder parallel ekinshi synyptarǵa jetekshilik etedi. Ekeýiniń ómir joly da, kásibı tańdaýy da bir arnaǵa toǵysqan.
— Jankúmis qaıda jumys istese, men de sondamyn. Eńbek kitapshamyzda jazý birdeı. Dostarymyz da ortaq. Egiziń bolǵanynyń jaqsy tustary kóp qoı. Biraq, oqyp júrgende birimiz úshin birimiz emtıhan tapsyrǵan kezder bolǵan joq. Al qazir jumysta birimizdiń ornyna birimiz sabaq beretin kezder bolady. Ekeýimizde de ekinshi synyp. Jospardy birge quramyz, tanystyrylymdardy birge isteımiz. Sondyqtan bizge ońaı. Bir-birimizden surap, aqyldasyp, qoldap, qıyndyqtardy birge eńseremiz, — deıdi Aıkúmis Asqarqyzy.
Shal aqyn aýdany Balýan aýylynda dúnıege kelgen egizder 9-synypty bitirgennen keıin pedagogıkalyq kolledjge oqýǵa tústi, keıin joǵary oqý ornyn támamdady. Qazir ata-analary, baýyrlary da Petropavlda turady. Aıkúmis pen Jankúmis otbasyndaǵy alty balanyń tuńǵyshy.
— Otbasymyzda bizdi esh qınalmastan ajyratady. Biraq, keıde ákem shatastyryp jatady. Sol sebepti birden «Aıko-Janko» dep qatar aıtady. Al anamyz daýysymyzdan, júrisimizden de biledi.
Oqýshylarymyzǵa bizdi tanyp, bilýge eki apta jetkilikti boldy, qazir shatastyrmaı atymyzdy durys aıtady.
Biraq minezimiz eki túrli. Ápkem maǵan qaraǵanda eti tiri, pysyq, — deıdi Jankúmis.
Qyzdardyń sózine qaraǵanda, egizderdiń arasynda kózge kórinbeıtin, tereń rýhanı baılanys bar. Biriniń kóńil kúıin ekinshisi alystan sezip, oıyndaǵysyn aıtyp úlgermeı-aq uǵady. Olardyń ómirge degen kózqarasy da birdeı.
— Talǵamymyz da birdeı. Jańa kıim alsaq, ony ekeýimiz de kıe beremiz. Sondaı-aq, alǵa qoıǵan maqsatymyz da uqsas. Qazir bastaýysh synypta sabaq berip júrmiz. Biraq bilimimizdi tolyqtyryp, aǵylshyn tiline bet burýdy oılap júrmiz. Sol úshin bıyl magıstratýraǵa túspek oıymyz bar, — deıdi Jankúmis Asqarqyzy.
Buǵan deıin Oralda Ulttyq ulan qatarynda egizderdiń saltanatty túrde ant bergenin jazǵan edik.