Petropavlda dúkenge jarylǵysh zat «qoıǵan» áıel ustaldy
ASTANA. QazAqparat - Petropavl qalasyndaǵy saýda dúkenderiniń birinde jarylǵysh zattyń baryn aıtyp, jalǵan habarlama taratqan áıel ustaldy, dep habarlaıdy QazAqparat HAA tilshisi SQO ІІD baspasóz qyzmetine silteme jasap.
Departament baspasóz qyzmetiniń habarlaýynsha, jeksenbi kúni saǵat 10:00-der shamasynda «102» nómirine «Sokol» dúkeninde jarylǵysh zattyń qoıylǵany týraly habarlama kelip túsken. Oqıǵa ornyna birden shúǵyl qyzmet ókilderi kelip, 20 adam qaýipsiz jerge kóshirilgen.
«Tekserý jumystary barysynda jarylǵysh zat ta, ózge de kúdikti zat tabylǵan joq. Kóp keshikpeı, jalǵan habarlama bergeni úshin oblys ortalyǵynda turatyn áıel kúdikti retinde ustaldy. Atalǵan is boıynsha QR QK-niń 273-baby negizinde qylmystyq is qozǵaldy», - dep habarlaıdy vedomstvonyń baspasóz qyzmeti.
Kúdiktiniń aıyby sotta dáleldengen jaǵdaıda oǵan 6 jylǵa deıin bas bostandyǵynan aıyrý jazasy taǵaıyndalýy yqtımal.
foto:fedpress.ru
