Petropavlda dúkenge qarýly shabýyl jasaǵandar ustaldy
PETROPAVL. QazAqparat - Petropavldyń polıtsııa qyzmetkerleri táýlik boıy jumys isteıtin dúkenge qarýly shabýyl jasady degen kúdikpen eki azamatty ustady, dep habarlaıdy «QazAqparat» HAA tilshisi SQO ІІD-iniń baspasóz qyzmetine silteme jasap.
Qylmys shamamen tańǵy saǵat 5-te bolǵan. Dúkende ornatylǵan baqylaý kameralaryna betperde kıip qarýlanǵan eki azamattyń dúkenge kirip, kúzetshige tapansha kezenip shyǵaryp, kassadaǵy aqshany alyp, belgisiz baǵytta izderin jasyrǵany túsip qalǵan.
Úreılengen kúzetshi men satýshy shabýyl jasaýshylar jaıly eshqandaı aqparat bere almady. Qarýlanǵan qylmyskerler betperde kıgen jáne óte uıymshyldyqpen áreket etken. Polıtsııa shabýyl jasaýshylardy ustady. Olar Petropavldyń buǵan deıin sottalmaǵan 1993 jáne 1998 jyly týǵan eki turǵyny bolyp shyqty. Tergeý amaldary barysynda zattaı aıǵaqtar tabylyp, tárkilendi: pyshaq, qolǵaptar, betperde jáne kúzetshiniń tapanshasy. Tonaýǵa arnalǵan jaraqtardy jas jigitter aldyn ala qalanyń ár aýdanyndaǵy saýda úılerinen satyp alǵan.
Táýlik boıy isteıtin azyq-túlik dúkenin tonaý týraly sheshim onyń qala shetinde ornalasqanymen baılanysty qabyldanǵan. Ustalǵandar óz kinálaryn tolyqtaı moıyndap otyr. Qazirgi ýaqytta ekeýi de qamaýǵa alyndy. QR Qylmystyq kodeksiniń 192-babynda kózdelgen «Tonaýshylyq» boıynsha sotqa deıingi tergeý amaldary júrgizilip jatyr. Ustalǵandar 10 jylǵa deıin bas bostandyǵynan aıyrylýy múmkin.
