Petropavlda dúkenge qaraqshylyq shabýyl jasaldy
PETROPAVL. QazAqparat – Petropavlda azyq-túlik dúkenderiniń birine qaraqshylyq shabýyl jasaldy, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, 22 aqpan kúni keshqurym Petropavldyń shetindegi azyq-túlik dúkenderiniń birinde belgisiz er adam satýshyny pyshaqpen qorqytyp, aqsha talap etken. Áıeldiń aıtýynsha, qaraqshy 30 myń teńgege jýyq aqshany oljalaǵan.
Petropavldyń birinshi polıtsııa bóliminiń qyzmetkerleri jedel-profılaktıkalyq is-sharany qolǵa aldy. Saýda ornynda beınebaqylaýdyń joqtyǵy olardyń jumysyn qıynata tústi. Krımınaldyq polıtsııa qyzmetkeri oqıǵa ornynda júrgizgen jumys barysynda kúdiktini anyqtady.
Dúkenshi qylmyskerdi sıpattap bergen. Nátıjesinde buryn esirtkimen aınalysqan, urlyq jasap, tonaǵany úshin birneshe ret qylmystyq jaýapkershilikke tartylǵan 31 jastaǵy qala turǵyny anyqtaldy. Tekserý barysynda onyń atalǵan qylmysqa qatysy bary rastaldy. Er adamnan pyshaq alyndy. Medıtsınalyq kýálandyrý onyń mas kúıdegi jaǵdaıyn anyqtady. Atalǵan fakti «Qaraqshylyq» baby boıynsha Sotqa deıingi tergep-tekserýlerdiń biryńǵaı tizilimine engizildi. Qazirgi ýaqytta kúdikti qamaýǵa alyndy.
«Barlyq kásipkerlerge bıznes-obektilerdi kúzetý men tehnıkalyq nyǵaıtý boıynsha sharalar qabyldaýǵa keńes beremiz. Beınebaqylaý qylmystardy ashý protsesin jedeldetip qana qoımaı, qylmyskerlerdi ustaýǵa septigin tıgizedi, beınekameralarmen jabdyqtalǵan saýda oryndarynda múliktik qylmystardyń sırek jasalatynyn atap ótken jón», - deıdi birinshi PB bastyǵynyń orynbasary Talǵat Smaǵulov.
