Petropavlda dúkender men dárihanalar keshki 18.00-ge deıin jumys isteıdi
NUR-SULTAN. QazAqparat - Soltústik Qazaqstan oblysynyń ákimi Qumar Aqsaqalov Petropavl qalasynda karantınde qandaı ózgerister bolatynyn túsindirdi, dep habarlaıdy QazAqparat tilshisi.
«Memlekettik organdar, ákimdikter, aýrýhanalar, quqyq qorǵaý organdary, kommýnaldyq qyzmet pen ózge de qalanyń tynys-tirshiligin qamtamasyz etetin nysandardan basqa kásiporyndar men uıymdar óz qyzmetin toqtatýy tıis. Buǵan deıin memlekettik qyzmetshiler qashyqtan jumys isteý rejımine kóshken edi. Bul jumys kúsheıtiledi. Búgin memorgan basshylaryna qyzmetkerlerdi barynsha qashyqtan jumys isteýge kóshirýdi tapsyrdym», - dedi oblys ákimi «QYZYLJAR» telearnasynyń tikeleı efırinde.
Azyq-túlik dúkenderi men sýpermarketter, dárihanalar 10.00-den 18.00-ge deıin jumys isteıdi.
«Turǵyndar jaqyn mańdaǵy azyq-túlik dúkenine, dárihanaǵa jáne jumysqa ǵana bara alady. Qalǵan jaǵdaılarda polıtseıler 26 myń teńge aıyppul salady nemese 5 táýlikke deıin qamaýǵa alady. 65 jastan asqan turǵyndar úıde bolýy kerek. Sizder nazardan tys qalmaısyzdar. «Qazposhta» qyzmetkerleri zeınetaqyny úıge deıin aparyp beredi», - dedi ákim.
Onyń aıtýynsha, QHA bazasynda eriktiler shtaby quryldy. Olar qarttar men múmkindigi shekteýli jandarǵa azyq-túlik pen dári-dármek jetkizedi.
«Kómek qajet bolǵan jaǵdaıda qalalyq 109 koll-tsentrine habarlasý qajet. Volonterler mindetti túrde kómektesedi. Bir sózben aıtqanda karantın tolyq oqshaýlaný uǵymyn bildiredi. Qalamyz jańa tártipte tirshilik etedi jáne barlyq qaǵıdalardy saqtaýymyz qajet. Biz qazir kórinbeıtin jaýmen kúresip jatyrmyz. Bul qıyndyqtyń barlyǵy - ýaqytsha. Qaǵıdalardy ustansaq, bul qıyndyqty da eńseremiz», - dedi Qumar Aqsaqalov.
Aıta keteıik, 3 sáýir kúni saǵat 00.00-de Petropavl qalasy aýmaǵyna karantın rejımin engiziledi. Turǵyndar túnge deıin qalaǵa kirip-shyǵa alady.
Barlyq qoǵamdyq oryndar, saıabaqtar men skverler jabyldy. Qala mańy avtobýstary men barlyq qoǵamdyq kólik qozǵalysy toqtaıdy.
