Petropavlda dúken tonaýǵa kelgen qaraqshy satýshydan «taıaq jedi»
ASTANA. QazAqparat - Petropavl qalasynyń dúkenderiniń birine shabýyl jasaǵan er adam satýshy áıelden «taıaq jedi», dep habarlaıdy «QazAqparat» HAA tilshisi SQO ІІD baspasóz qyzmetine silteme jasap.
Jabylýyna az ǵana ýaqyt qalǵan Petropavl qalasyndaǵy dúkenderdiń birine mas bolǵan er adam basa kóktep kirip, kasany aqtara bastaıdy. Buǵan ashýlanǵan satýshy áıel oǵan jaqyndaı bergende er adam qaltasynan pyshaq alyp shyǵyp, aqsha talap etken.
«Qaraqshynyń soryna qaraı, dúken satýshysy er minezdi áıel bolyp shyqty. Satýshy «shaqyrylmaǵan qonaqtyń» mastyǵyn paıdalanyp, pyshaǵyn tartyp alyp, dúkennen qýyp shyqqan. Qapelimde ne bolǵanyn túsinbeı qalǵan er adam «eki júz teńge berseńshi» degen. Degenmen áıel esikti tars jaýyp, dabyl batyrmasyn basyp jibergen», - delingen habarlamada.
Arada úsh jarym mınýt ýaqyt óter-ótpesten kúzet agenttiginiń qyzmetketkerleri kúdiktini ustap alyp, polıtsııaǵa tapsyrǵan.
Ustalǵan 57 jastaǵy Petropavl turǵyny túrmeden jýyqta ǵana shyqqan, 7 ret sottalǵan adam bolyp shyqty. Bul joly ol QR QK-niń 192-baby boıynsha qylmystyq jaýapkershilikke tartylatyn bolady.
Oblystyq quzyrly vedomstvonyń baspasóz qyzmetiniń habarlaýynsha, Soltústik Qazaqstanda kúzet qyzmetteriniń arqasynda jyl basynan beri 43 qylmystyq istiń beti ashylǵan.
