Petropavlda dúken órtenip, 125 adam qaýipsiz jerge shyǵaryldy
PETROPAVL. QazAqparat – Petropavlda bes qabatty úıdiń astynda ornalasqan «Karavan» dúkeni órtenip, 125 adam qaýipsiz jerge shyǵaryldy, dep habarlaıdy QazAqparat tilshisi.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, órt Petropavldaǵy N.Nazarbaev kóshesindegi 246 mekenjaıdaǵy «Karavan» dúkeninde 31 jeltoqsan kúni saǵat 19.15 mınýt ketkende shyqqan. Saýda ortalyǵy 5 qabatty úıdiń birinshi qabatynda ornalasqan.
Órt sóndirýshiler oqıǵa ornyna jetkende dúken ishindegi turmystyq taýarlar satatyn býtıkter janyp jatqan. Qatty tútin bolǵan. Órt sóndirýshiler úıdiń 4 podezinen 125 adamdy, sonyń ishinde 25 balany qaýipsiz jerge shyǵardy. Al dúken órt shyqqan kezde jabyq bolǵan. Polıtseıler dúken janyn qorshap, úı turǵyndaryn jergilikti atqarýshy bılik bólgen 4 avtobýsqa jáne TJD-niń «Vahtovka» KAMAZ-yna otyrǵyzýǵa kómektesti.
Órtti sóndirýge 12 tehnıka men 40-tan astam maman jumyldyryldy. Al saǵat 20.18 mınýt ketkende tolyq sóndirildi. Qaza tapqandar men zardap shekkender joq.
Mamandardyń aıtýynsha, órt 39 sharshy metr aýmaqqa taralyp, saýda oryndary men taýarlarǵa zaqym keldi. Aldyn ala boljam boıynsha, jalyn elektr symdarynyń qysqa tuıyqtalýynan shyǵýy múmkin.
Órt sóndirilip bolǵannan keıin úı turǵyndary páterlerine oraldy.
