Petropavlda donor birneshe adamnyń ómirin uzartty
PETROPAVL. KAZINFORM — Petropavlda máıittik donor tirkelip, ómirden ótken adamnyń aǵzalary keminde úsh adamnyń ómirin saqtap qaldy.
Transplanttaýdy jáne joǵary tehnologııalyq medıtsınalyq qyzmetterdi úılestirý jónindegi respýblıkalyq ortalyqtyń málimetinshe, 65 jastaǵy er adam jedel járdem qyzmetimen Petropavldaǵy kópsalaly qalalyq jedel medıtsınalyq járdem aýrýhanasyna aýyr jaǵdaıda jetkizildi. Dárigerler onyń ómirin saqtap qalý úshin barlyq qajetti medıtsınalyq kómekti kórsetkenimen, júrgizilgen sharalarǵa qaramastan mı ólimi tirkeldi.
Marqumnyń uly ákesiniń aǵzalaryn donorlyqqa berýge kelisimin bildirgen.
Aýa raıynyń qolaısyzdyǵyna qaramastan sanıtarlyq avıatsııa bortynda Ulttyq ǵylymı onkologııa jáne transplantologııa ortalyǵynyń transplantolog dárigerler brıgadasy Petropavlǵa der kezinde jetip, mýltıorgandyq operatsııa júrgizdi. Operatsııa barysynda donordan baýyry men eki búıregi alyndy.
Dárigerlerdiń aıtýynsha, bul aǵzalar birneshe naýqastyń ómirin saqtap qalýǵa múmkindik bermek.
Buǵan deıin elimizde donorlyqqa kelisimin bergenderdiń sany 3 esege jýyq óskenin jazǵan edik.