Petropavlda daýyldyń saldarynan 13 qosalqy stantsııa isten shyqty
«Qazgıdromet» RMK Soltústik Qazaqstan oblystyq fılıalynyń málimetinshe, Petropavlda jaýyndy daýyl 7 maýsym kúni keshki saǵat 20.44-te bastalyp, 38 mınýtqa sozylǵan. Jeldiń ekpini sekýndyna 29 metrge deıin jetti. Osy aralyqta 21,4 mm jaýyn jaýdy, bul aılyq normanyń jartysy.
Qatty daýyldan aǵashtar qulap, keı nysandarǵa zaqym keldi. Muny áleýmettik jelide turǵyndar bólisken beınejazbalardan kórýge bolady.
Petropavl qalalyq ákimdigi baspasóz qyzmetiniń málimetinshe, «ikomek-109» qyzmetine oblys ortalyǵy turǵyndarynan keshki saǵat 21.00-den tańǵy saǵat 8.00-ge deıin 215 ótinish kelip tústi. Onyń 90 % jaryqtyń sóndirilýine qatysty bolǵan.
«Petropavlda 13 qosalqy stantsııada jaryq óshirildi. Jumysyn qalpyna keltirý úshin birneshe saǵat kerek boldy. Búgin tańerteń 20-yqsham aýdannyń bir bóliginde, balyq tálimbaǵy aýdanynda, óndiristik aımaqta, Gashek jáne Ýálıhanov kóshelerinde ornalasqan birqatar nysanda áli elektr qýaty joq. Olarǵa jaryq berý úshin jumys túni boıy júrgizildi, áli júrip jatyr.
Daýyldyń saldarynan aǵash butaqtary synyp, kóshe, aýlalarǵa qulady. Arnaıy qyzmetke osyndaı fakti boıynsha 19 qońyraý shalyndy. Zardap shekkender joq», - dedi Petropavl qalasy ákiminiń baspasóz hatshysy Elmıra Sádýaqasova.
Mamannyń aıtýynsha, Petropavl ákimi men ákimdik mamandary sol kúni daýyldyń saldaryn tekserýge shyǵyp, aǵash pen butaqtarynyń synyp qulaýynyń 24 faktisin anyqtady. Birinshi kezekte avtojoldarda jatqan aǵashtar alyndy, keıin kommýnaldyq qyzmetter aýlalardy tazartty. Jumys áli júrip jatyr.
«Qatty jaýynnyń saldarynan Qazaqstan Konstıtýtsııasy, 55 jáne Astana, 39 meken jaılarynda ornalasqan kópqabatty úılerdiń shatyrynan sý ketti. Páterlerge sý kirgen joq. Ákimdik ókilderi osy úılerdiń PIK jáne MIB tóraǵalarymen kezdesip, sóılesip, túsindirý jumystaryn júrgizdi. Búgin olar shatyrlardy jóndeýge kirisedi», - dedi Elmıra Sádýaqasova.
