Petropavlda daýyl botanıkalyq baqtyń shatyryn julyp áketti
PETROPAVL. KAZINFORM – Qatty daýyl Petropavl qalasyndaǵy ǵasyrlyq tarıhy bar botanıkalyq baqtyń shatyryn julyp áketti.
Daýyl saldarynan baqtyń qysqy jylyjaıynyń shatyry zaqymdanyp, polıkarbonat jabyndysy julynyp ketken. Zaqymdanǵan aýmaq shamamen 6 sharshy metr.
- Bul materıal 15 jyl buryn tóselgen. Sońǵy ret jóndeý 2023 jyly júrgizildi. Alaıda jumys sapasyz oryndaldy. Bul týraly aıttyq, jazdyq, eskerttik. Bıyl shatyrda sańylaýlar paıda bolyp, materıal maıysyp, berik turmaǵan soń, daýylǵa shydas bermeı julynyp ketti, – deıdi botanıkalyq baqtyń dırektory Artýr Rıazapov.
Qazir jóndeý jumystaryn shuǵyl atqarý múmkin emes. Oblystyq jáne qalalyq ákimdik pen Bilim basqarmasynan mamandar kelgenimen, qatty jelden qurylysshylar shatyrǵa kóterile almady. Tek tesikti ýaqytsha jabý joldaryn aqyldasty. Bul jumys aýa raıy turaqtalǵan soń júrgiziledi dep josparlanyp otyr.
- Qazir bizge 32-lik uıaly polıkarbonat qajet. Alaıda mundaı materıal Qazaqstanda óndirilmeıdi. Buryn ony Qazan qalasynan aldyrtatynbyz, biraq ol jerde de óndiris toqtatylǵan. Sondyqtan arnaıy tapsyryspen ǵana jasatýymyz kerek, – dedi mekeme basshysy.
Sondaı-aq ol qysqy baq ashyq alańqaıda ornalasqandyǵyn, aınalasynda jelden qorǵaıtyn aǵashtar joq ekenin atap ótti. Sonyń saldarynan daýyldyń áseri kúsheıgen. Búginde ortalyqtandyrylǵan jylý trassa jóndelip jatqandyqtan erte sóndirilgen. Burynǵy jyldary baqtyń ótinishi boıynsha jylý sońǵy bolyp toqtatylatyn. Qazir mekeme jylý súıgish ósimdikterdi aman alyp qalý úshin elektr kalorıferlerdi paıdalanyp otyr.
- Bizge kútýge týra keledi, óıtkeni negizgi tender ótýi kerek. Qazir qalalyq ákimdik qurylysshylardy jiberip, olar tesikti jabady. Óıtkeni bulaı qaldyrýǵa bolmaıdy, túnde sýyq, úsik júredi, - deıdi Artýr Rıazapov.
Botanıkalyq baq qazir Soltústik Qazaqstan oblystyq Bilim basqarmasynyń balansynda tur.
- Botanıkalyq baq shatyryndaǵy zaqymdanýdy joıý úshin tekserý júrgizilip, «T.A. Gaısına» JK aǵymdaǵy jóndeý jumysyna smeta ázirledi. Osy smeta negizinde baǵa usynysy tásilimen memlekettik satyp alý júrgiziledi jáne aldaǵy 2 aptada aǵymdaǵy jóndeý jumystary atqarylady. Shatyrdaǵy zaqymdanýdy joıý úshin alpınıster men arnaıy tehnıkany da tartý qajet bolady, - dep jaýap berdi oblystyq Bilim basqarmasynda.
Botanıkalyq baqtyń shatyry tek tozǵan emes, konstrýktsııa jaǵynan da eskirgen. Sońǵy ret joba-smetalyq qujattama 2016 jyly jasalǵan eken. Al 2023 jyly aǵymdaǵy jumys júrgizilgen. Bıyl da dál sondaı jóndeýmen shektelmek.
Buǵan deıin SQO-da daýyl saldarynan zıratqa barǵan áıelge aǵash qulap, saldarynan mert bolǵanyn jazǵan edik.