Petropavlda dárigerler vaktsınatsııadan keıin qoly isken boıjetkenge qatysty túsinik berdi
PETROPAVL. QazAqparat – Petropavlda koronavırýsqa qarsy vaktsına alǵan boıjetkenge ota jasaýǵa týra keldi. Ekpeniń orny isip, irińdegen, dep habarlaıdy QazAqparat tilshisi.
Petropavlda koronavırýsqa qarsy ekpe alyp, keıin onyń orny isip, irińdegeni jaıynda turǵyndardyń biri áleýmettik jelide jarııalady.
Boıjetkenniń aıtýynsha, vaktsına qoıǵannan keıin orny isip, kógerip, dene qyzýy kóterilgen. Úsh kúnnen keıin jedel járdem qyzmetin shaqyrǵan oǵan, oblys ortalyǵyndaǵy emdeý mekemeleriniń birinde jedel túrde ota jasaǵan. Ekpeniń orny irińdegen eken.
Soltústik Qazaqstan oblysy densaýlyq saqtaý basqarmasy jetekshisiniń orynbasary Qumar Kúsemisov osy jaǵdaıǵa qatysty túsinik berdi. Medıtsınalyq qyzmetkerdiń aıtýynsha, koronavırýsqa qarsy vaktsınany qoıdyrýǵa qorqýdyń qajeti joq. Preparattar tolyq zerttelgen.
«Boıjetkenge postınektsııalyq gematoma dıagnozy qoıyldy. Munyń koronavırýs vaktsınasyna jáne medıtsınalyq qyzmetkerlerdiń ekpe jasaý tehnıkasyna esh qatysy joq. Mundaı asqyný kez-kelgen vaktsınany egýden keıin bolýy múmkin. Ine tamyrǵa kirgen, saldarynan bulshyqetterdiń arasynda gematoma paıda bolǵan. Medıtsınalyq mekemede jara ashylyp, irińnen tazartyldy, bakterıologııalyq sebindige tekserildi. Saraptama nátıjesi teris bolyp shyqty», - deıdi Qumar Kúsemisov.
