Petropavlda dárigerler áıeldiń ótinen jumyrtqanyń úlkendigindeı tas aldy
PETROPAVL. KAZINFORM – Petroopavlda 58 jastaǵy áıelge ota jasalyp, onyń ót qabynan taýyq jumyrtqasyndaı bolatyn tas alyndy.
Petropavldaǵy kópbeıindi qalalyq jedel medıtsınalyq járdem aýrýhanasyna syrqat qatty aýyryp kelgen. Ol ishiniń joǵarǵy bóligi aýyryp, júregi aınıtynyn, aýzyna aşy dám keletinin aıtqan jáne jalpy álsizdikke shaǵymdanǵan. Aıtýynsha, bul sımptomdar maıly jáne qýyrylǵan taǵamdar jegennen keıin paıda bolyp, bir táýlik boıy basylmaǵan.
Dárigerler tekserý barysynda onyń ótinde tastardyń barlyǵyn anyqtady. Tastardyń biriniń úlkendigi taýyq jumyrtqasyndaı bolǵan.
Dárigerler shuǵyl operatsııa jasaý týraly sheshim qabyldady. Ota bir jarym saǵatqa sozylyp, sátti aıaqtaldy.
Ót qabynan birneshe tas alynyp, derttiń asqyný qaýpi joıyldy. Qazir naýqas úıinde, táýir bolyp keledi.
Dárigerlerdiń aıtýynsha, óttegi tasty alýdy keıinge qaldyrmaý mańyzdy. Bul dert kópke deıin belgi bermeýi múmkin, biraq kez-kelgen ýaqytta: jedel holetsıstıtke, ıaǵnı ót qabynyń qabynýyna, ót joldarynyń bitelýine, sary aýrýǵa, holangıt, pankreatıtke nemese adam ómirine qaýipti ót qabynyń perforatsııasyna ákeledi.
- Oń jaq qabyrǵanyń asty aýyrsa, aýzyńyzǵa aşy dám kelse, ásirese tamaqtan keıin júrek aınysa mindetti túrde dárigerge kóringen jón. Ýaqtyly dıagnoz qoıý jáne emdeý aýyr zardaptyń aldyn alady, - deıdi dárigerler.
Buǵan deıin Petropavlda 20 metr bıikten qulaǵan jigit aman qalǵanyn jazǵan edik.