Petropavlda dárigerler áıelden 10 kg isikti alyp tastady
PETROPAVL. KAZINFORM — Soltústik Qazaqstan oblystyq onkologııalyq ortalyqta 48 jastaǵy áıeldiń qursaq qýysynan ota arqyly óte úlken analyq bez isigi alyndy.
Onkologııalyq ortalyqtyń málimetinshe, kúrdeli ota 2 saǵatqa sozylǵan. Operatsııany jergilikti mamandar jasady. Bul jaǵdaıdyń ereksheligi — isiktiń kólemi erekshe úlken bolǵan. Naýqastyń dene salmaǵy 150 keli bolsa, alyp tastalǵan isiktiń salmaǵy shamamen 10 kelige jetken. Dárigerler naýqasqa qursaq qýysynda isiktiń baryn bir jyl buryn aıtqan. Alaıda áıel jaǵdaıy ábden nasharlap, júre almaı qalǵanda ǵana medıtsınalyq kómekke júgingen.
Operatsııa barysynda isiktiń kólemin kishireıtý maqsatynda aldymen drenajdaý júrgizilgen. Osydan keıin ǵana ony qursaq qýysynan alyp shyǵý múmkin boldy.
Dárigerler eshqandaı shaǵym bolmasa da, dárigerge qaralýdy keıinge qaldyrmaýǵa keńes beredi. Turaqty profılaktıkalyq tekserýler aýrýlardy erte kezeńde anyqtaýǵa jáne emniń tıimdiligin arttyrýǵa múmkindik beredi.
Buǵan deıin SQO-da qaterli isiktiń qaı túrleri kóp taralǵanyn jazǵan edik.
