Petropavlda dárigerge qol kótergen naýqasqa qylmystyq is qozǵaldy
PETROPAVL. KAZINFORM – Petropavlda emhanadaǵy janjal barysynda er adam dárigerdiń betinen urǵan.
Soltústik Qazaqstan oblystyq Polıtsııa departamentiniń málimetinshe, oqıǵa 17 tamyz kúni tańerteń bolǵan. Qabyldaýǵa kelgen 51 jastaǵy qala turǵyny dárigermen sóılesken. Áńgime barysynda daý týyndaǵan. Polıtsııaǵa túsken aryzǵa sáıkes, medıtsına qyzmetkeriniń eskertýine er adam agressıvti jaýap berip, qol kótergen.
Polıtsııa qyzmettik mindetin atqaryp júrgen medıtsına qyzmetkerine kúsh qoldaný faktisi boıynsha qylmystyq is qozǵady.
– Bul – óńirde medıtsına qyzmetkerine kúsh qoldanýǵa qatysty tirkelgen ekinshi jaǵdaı. Maýsym aıynda Shal aqyn aýdanynda jol-kólik oqıǵasynan keıin kómek kórsetip jatqan medıtsına qyzmetkerine mas er adam kúsh qoldanǵan. Sot ony 1,5 jylǵa bas bostandyǵynan aıyrdy, - deıdi oblystyq Polıtsııa departamenti bastyǵynyń birinshi orynbasary Álibek Qujahmetov.
Bıyl Qazaqstan Respýblıkasynyń Qylmystyq kodeksine 380-3-bap engizildi. Onda medıtsına qyzmetkerine nemese jedel medıtsınalyq járdem kóliginiń júrgizýshisine qatysty qorqytý nemese kúsh qoldanǵany úshin jaýapkershilik kózdelgen. Endi medıtsınalyq kómek kórsetip júrgen adamdarǵa qatysty agressıvti áreket qylmystyq jaýapkershilikke ákep soǵýy múmkin.
Buǵan deıin Prezıdent dárigerdi qorǵaý Zań men tártip qaǵıdatyna tolyq saı keletinin aıtqanyn jazǵan edik.
