Petropavlda dárigerdi uryp, keıin er adamdy pyshaqtaǵan jasóspirim sottaldy
PETROPAVL. KAZINFORM – Soltústik Qazaqstan oblysynyń kámeletke tolmaǵandar isteri jónindegi mamandandyrylǵan aýdanaralyq soty urlyq, buzaqylyq jáne bılik ókiline kúsh qoldandy degen aıyp taǵylǵan Grıgorıı Agaev pen onyń tórt sybaılasyna úkim shyǵardy.Negizgi aıyptalýshy Agaev ótken jyldyń 23 qazanynda oblystyq balalar aýrýhanasyna basa kóktep kirip, dárigerlerge shabýyl jasaǵan.
Ol medıtsına qyzmetkerlerin tapanshamen qorqytqan. Keıin onyń oıynshyq ekeni anyqtaldy.
2023 jyldyń 4 qarashasynda Agaev sybaılasy Temirlan Túnqatarovpen birge Petropavl qalasyndaǵy Nazarbaev kóshesi, 211 mekenjaıynda ketip bara jatqan adamdy esh sebepsiz soqqyǵa jyǵyp, densaýlyǵyna zııan keltirgen.
«2023 jyldyń 21 qarashasynda Seıfýllın kóshesindegi №60 úıdiń qasynda Agaev qoǵamdyq tártipti buzyp, dáret syndyrǵan. Ony kórgen qala turǵyny eskertý jasaıdy. Jasóspirim onyń jambasy men bilegine pyshaq suǵyp, densaýlyǵyna zııan keltirgen. Sonymen qatar, 2023 jyldyń 27 qarashasynda Agaev Gorkıı kóshesi, 209 a mekenjaıynda ornalasqan sot ǵımaratynan №66 mekeme - tergeý ızolıatoryna barmaı qashpaqshy bolǵan. Ol oblystyq polıtsııa departamenti vzvodynyń qyzmetkeriniń betinen basymen urǵan», – delingen oblystyq sottyń baspasóz habarlamasynda.
Qalǵan aıyptalýshylar: Temirlan Túnqatarov urlyq jáne buzaqylyq, Tımýr Melnıkov, Alekseı Rýdnıtskıı jáne Nıkolaı Gýdenkov urlyq baby boıynsha sottaldy.
2023 jyldyń qazany men qarasha aılarynda Agaev, Rýdnıtskıı, Gýdenkov jáne Melnıkov birneshe urlyq jasaǵan. Olar «Magnum Cash Carry», «FamilyMarket», «Sportmaster» jáne «HipShop» dúkenderiniń taýarlaryn qoldy qylǵan.
Sot úkimimen Grıgorıı Agaev úsh jylǵa bas bostandyǵynan aıyryldy. Jasóspirim jazasyn qaýipsizdigi ortasha deńgeıdegi kámeletke tolmaǵan qylmyskerlerge arnalǵan mekemede óteıdi. Temirlan Túnqatarovtyń úsh jylǵa bas bostandyǵy shekteldi, probatsııalyq baqylaý júrgizilmek.
Tımýr Melnıkov eki jylǵa, Nıkolaı Gýdenkov bir jyl tórt aıǵa, Alekseı Rýdnıtskıı bir jylǵa shartty túrde bas bostandyǵynan aıyryldy.
Sonymen qatar, sottalýshylar «Magnum Cash Carry» JShS jáne «SportMasterKazahstan» JShS keltirgen materıaldyq shyǵyndy óteıdi.
Úkim zańdy kúshine engen joq.
