Petropavlda dámhana kassasynan aqsha urlaǵan kúdikti ustaldy
PETROPAVL. QazAqparat – Petropavlda belgisiz bireý ákimshiniń joqtyǵyn paıdalanyp, dámhana kassasynan 126 myń teńgeni urlaǵan, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, oqıǵa Petropavldaǵy Internatsıonal kóshesindegi dámhanalardyń birinde bolǵan. Keshki saǵat 18.25 shamasynda bireý kassadan 126 myń teńgeni alyp, taıyp turǵan. Ákimshiniń shaqyrýymen jetken polıtseıler jedel tergeý jumystaryn júrgizdi. Nátıjesinde urlyq jasaýy múmkin degen kúdikpen Petropavl qalasynyń 27 jastaǵy turǵyny ustaldy. Ol buǵan deıin jasaǵan qylmysy úshin sottalǵan eken.
Tergeý barysynda er adam kassadan aqsha urlaǵanyn moıyndady. Aıtýynsha, sol kúni dámhanaǵa eki tanysymen kirgen. Bar janynda eshkimniń joqtyǵyn kórip, kassadan aqshany alyp ketken. Dámhanadan shyǵysymen olja aqshany qajetine jumsaǵan, alaıda, kóp uzamaı polıtseıler ony qolǵa túsirdi.
Petropavl qalalyq polıtsııa basqarmasy ekinshi polıtsııa bóliminiń bastyǵy Rýslan Syzdyqovtyń aıtýynsha, qazirgi ýaqytta «Urlyq» baby boıynsha sotqa deıingi tergeý júrgizilýde. Kúdiktiniń basqa qylmystarǵa qatysy tekserilip jatyr.
