Petropavlda buralqy ıtterdiń adamdarǵa shabýy jıiledi
PETROPAVL. KAZINFORM — Petropavlda bıyl ıtten zardap shekken 53 adam dárigerge qaralǵan. Olardyń ishinde balalar da bar.
Turǵyndardyń qaýipsizdigin qamtamasyz etý jáne qańǵyrǵan janýarlardy ýaqytsha ustaýǵa arnalǵan oryn salý týraly máseleler «AMANAT» partııasynyń oblystyq fılıaly janyndaǵy óńirlik damý keńesiniń otyrysynda kóterildi.
— Buralqy ıtterdiń adamǵa shabý jaǵdaılary negizinen turǵyn úılerdiń aýlalarynda, mektepter men balabaqshalardyń mańynda tirkeledi. Iesiz ıtter toptasyp, adam ómiri men densaýlyǵyna — ári fızıkalyq, ári psıhologııalyq turǵyda qaýip tóndiredi. Sonymen qatar, ekpeden ótpegendikten, olar qutyrý, brýtsellez, týberkýlez sııaqty qaýipti aýrýlardy taratýy múmkin, — deıdi Petropavl qalalyq polıtsııa basqarmasy Jergilikti polıtsııa qyzmeti bólimi bastyǵynyń orynbasary Jaqsylyq Baıbosynov.
Tártip saqshysynyń aıtýynsha, qańǵyrǵan janýarlar sanyn retteýge arnalǵan keshendi baǵdarlama joq, al kúshtik sharalar jetkiliksiz. «Janýarlarǵa jaýapkershilikpen qaraý týraly» zań ıesiz janýarlardy óltirýge tyıym saldy. Alaıda olardy zararsyzdandyrý men ýaqytsha ustaýǵa arnalǵan qajetti ınfraqurylym áli kúnge deıin joq.
— Renovatsııa men sý tasqynynan keıin kóptegen turǵyn ıt-mysyǵyn qańǵyrtyp jiberdi. Saldarynan olar kóshede qaptap júr. Biz bul máseleni únemi talqylaımyz, biraq eshteńe ózgermeıdi. Baqylaýdy kúsheıtý, aıyppul salý, mektepterde jáne ata-analar jınalystarynda jaýapkershilik týraly aıtý qajet. Polıtsııa da bul iske aralasýy kerek — bul qoǵamdyq tárbıeniń bir bóligine aınalýy tıis, — dedi Soltústik Qazaqstan oblystyq máslıhatynyń depýtaty ıÝlııa Pronına.
Óńirlik damý keńesi tóraǵasynyń orynbasary Vladımır Vıtchenkonyń aıtýynsha, mindetti chıpteý qarastyrylmaǵan, sondyqtan janýar ıelerine aıyppul salý zań júzinde múmkin emes.
— Petropavlda ıesiz janýarlardy ustaý men baqylaýǵa jyl saıyn shamamen 69 mıllıon teńge bólinedi. Júrgizilgen taldaý nátıjesine sáıkes, bólingen qarajat úsh veterınar, eki júrgizýshi, bir aýlaýshy jáne peshke jaýapty bir qyzmetkerden turatyn shaǵyn ǵana shtattyń shyǵynyn jabady. Eger janýarlardy zararsyzdandyrý jáne ýaqytsha ustaýǵa arnalǵan qyzmetter naryǵy qurylmasa, qansha qarajat bólinse de nátıje bolmaıdy. Bul ispen aınalysatyn kompanııalar joq — lıtsenzııa, jabdyq joq, jańa standarttar boıynsha qalaı jumys isteý kerektigin túsinbeıdi. Biz usynystar daıyndap, bıznes ókilderin tartý, olardyń bul salaǵa kirýine kómektesýimiz qajet. Memleket tarapynan tapsyrys bolady. Bul kásipkerler úshin uzaqmerzimdi, — deıdi «AMANAT» partııasy oblystyq fılıalynyń atqarýshy hatshysy Jeńis Asanov.
Petropavl qalasy ákiminiń orynbasary Marlen Sandybekovtiń aıtýynsha, Petropavlda qańǵyrǵan janýarlardy ýaqytsha ustaýǵa arnalǵan orynnyń jobalyq-smetalyq qujattamasy daıyn. Alaıda bıylǵy 24 qyrkúıektegi Úkimet qaýlysyna sáıkes jańa ǵımarattar salýǵa jáne satyp alýǵa moratorıı engizilgen.
Sondyqtan bul máselege taraptar bir aıdan keıin qaıta oralyp, egjeı-tegjeıli talqylaıtyn boldy.
Buǵan deıin SQO-da segiz aıda janýarlardan 1,2 myń adam zardap shekkenin jazǵan edik.