Petropavlda búldirshindi kólik qaǵyp ketti
PETROPAVL. QazAqparat – Petropavlda 7 jasar balany jolaýshylar ótkelinde kólik qaǵyp ketti, dep habarlaıdy QazAqparat tilshisi.
Petropavlda áleýmettik jelide jol-kólik oqıǵasynda zardap shekken balanyń anasy oqıǵa kýágerlerin izdep jatyr. Aıtýynsha, túski saǵat 13.00 shamasynda jolaýshylar ótkelinde balany kólik soqqan. Qazir búldirshinniń jaǵdaıy aýyr.
Soltústik Qazaqstan oblysy polıtsııa departamenti baspasóz qyzmetiniń málimetinshe, oqys oqıǵa 4 tamyz kúni Petropavldaǵy Chaıkovskıı kóshesinde saǵat 12.50-de bolǵan. «Nissan» kóliginiń 58 jastaǵy júrgizýshisi abaısyzda jolaýshylar ótkelinen ótip bara jatqan 7 jasar búldirshindi qaqqan. Keıin jol-kólik oqıǵasynda jaraqattanǵan ony oblystyq balalar aýrýhanasyna jetkizgen.
«Medıtsınalyq kýálandyrý er adamnyń spırttik ishimdik ishpegenin kórsetti. Kólik arnaıy avtoturaqqa qoıyldy. Materıal protsessýaldy sheshim qabyldaý úshin Petropavl qalalyq polıtsııa basqarmasyna jiberildi», - delingen habarlamada.
