Petropavlda búldirshinder robot-polıtseı jasady
PETROPAVL. QazAqparat - Petropavldaǵy «Altyn besik» balalar baqshasynyń tárbıelenýshileri polıtsııaǵa qajetti robottar jasaý týraly ıdeıalaryn júzege asyrdy, dep habarlaıdy QazAqparat tilshisi.
Soltústik Qazaqstan oblystyq polıtsııa departamenti baspasóz qyzmetiniń aqparaty boıynsha, mektepke deıingi bilim berý mekemesinde STEM-zerthanasy óz jumysyn bastaǵan. Mundaǵy alǵashqy kórme jumysy polıtsııa salasyndaǵy robot tehnıkasyna arnalǵan.
«Arnur Qarataı jol apatyn boldyrmaý úshin kólik qozǵalysyn retteýge mindetti robot-retteýshini kórsetti. Taır Valeev gıdroskýtermen júretin robottardyń bir jaǵdaı bola qalǵan kezde qalaı kómektesetinin aıtty. Kótergish krannyń jumysy týraly Marýan Baızaq baıandady. Búldirshinder robot-evakýatorlardy, kótergish krandardy, drondardy, brondy mashınalardy qurap shyǵarǵan. Jas ónertapqyshtar olardyń ıdeıasynyń polıtsııa jumysyna úlken kómek bolatynyna senimdi», - dedi baspasóz qyzmetinen.
Innovatsııalyq ıdeıalardy usynǵan balalardyń ákeleri quqyq qorǵaý organdarynda jumys isteıdi.
«Bul polıtsııa departamenti men mektepke deıingi bilim berý mekemesiniń birlesken jobasy. Onyń basty maqsaty - balalardyń quqyqtyq sanasyn kóterý, polıtsııa mamandyǵyna qurmetpen qaraýǵa tárbıeleý. «Tsıfrlyq Qazaqstan» baǵdarlamasy aıasynda balalardyń ınnovatsııalyq oılaryn júzege asyratyn alań qurý týraly ıdeıany qoldadyq», - dep atap ótti Tyldy qamtamasyz etý basqarmasynyń bólim bastyǵy Qazbek Іlııasov.
