Petropavlda buqaralyq sportty nasıhattaǵan respýblıkalyq aktsııa ótti
PETROPAVL. QazAqparat – Petropavlda «Fitness park KZ» respýblıkalyq jobasy aıasynda buqaralyq sportty damytýdy maqsat etken is-shara ótti, dep habarlaıdy QazAqparat tilshisi.
«Fitness park KZ» jobasy QR Aqparat jáne qoǵamdyq damý mınıstrliginiń qoldaýymen Azamattyq bastamalardy qoldaý ortalyǵy granty aıasynda júzege asyp jatyr.
Joba Qazaqstannyń 17 aımaǵynda ótedi. Alǵashqysy Petropavldaǵy A.Vınokýrov sport saraıynda ótti. Oǵan oblys ortalyǵynyń 50-ge jýyq bapkeri, fıtnes nusqaýshylary men dene shynyqtyrý pániniń muǵalimderi qatysty. Jattyǵýdy «WorldClass» elıt-bapkeri, Qazaqstannyń fýtboldan chempıony, fýtboldan halyqaralyq oıyndar jeńimpazy, QR bodıbıldıng boıynsha jeńimpazy, Les Mills sertıfıkattalǵan bapkeri Rýslan Batyrbekov ótkizdi. Oǵan qazaqstandyq kásipqoı boksshy, WBA sýper jáne IBO nusqalary boıynsha álem chempıony, EBU nusqasy boıynsha Eýropa chempıony Janat Jaqııanov kómekke keledi.
«Bizdiń buqaralyq sportty damytýǵa arnalǵan baǵdarlamamyz ben ádistememiz QR Ulttyq ǵylymı-praktıkalyq dene shynyqtyrý ortalyǵy jáne «World Class» halyqaralyq fıtnes klýbtar jelisimen áriptestik barysynda ázirlendi. Nátıjesinde baǵdarlamalar kesheni jasaldy. Sergitý jattyǵýy 15 mınýtqa shaqtalǵan. Ulttyq bıdiń elementteri engizilgen», – deıdi joba dırektory, Ulttyq Delfıı Komıtetiniń dırektory Quralaı TÚSPEKOVA.
Jobaǵa jattyqtyrýshylardan bólek mektep oqýshylary, kolledj, ýnıversıtet stýdentteri qatysyp jatyr.
Petropavlda «Fitness park KZ» baǵdarlamasy eki kún ótip, 500-ge jýyq adamdy qamtý josparlanǵan.
