Petropavlda býhgalterlik uıym qyzmetkeri kásipkerdiń 8 mln teńgesin ıemdenip ketken
PETROPAVL. QazAqparat – Petropavlda býhgalterlik qyzmet kórsetetin mekemege sengen kásipker 8 mln teńge salyqtan bereshek bolyp qaldy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavldaǵy kásipkerdiń biri óziniń alaıaqqa jem bolǵanyn aıtyp aryzdandy. Aıtýynsha, qospa jemmen aınalysatyn ol jyl basynda býhgalterlik qyzmet kórsetetin mekemeniń biriniń kómegine júginedi. Onyń qyzmetkeri kásipkerge salyq tólemin júrgizýge kómektespek bolady. Er adam oǵan 300 myń teńgeden astam aqshasyn beredi. Keıin taǵy birneshe márte osy keńsege kelip, qujatyn senip qaldyrǵan. Al birneshe aıdan keıin ol salyq boıynsha qordalanǵan qaryzy baryn bilgen. Mekeme qyzmetkeriniń qolyna ustatqan 8 mln astam teńgesi bıýdjetke túspepti. Bul fakti Sotqa deıingi tergep-tekserýdiń biryńǵaı tizilimine «Alaıaqtyq» baby boıynsha engizildi.
«Petropavl qalasynyń 28 jastaǵy turǵynyna qatysty tergeý amaly bastaldy. Ol áıeldiń osyndaı basqa da qylmystarǵa qatysty bar-joǵy tekserilip jatyr. Eger de dál osyndaı jolmen zardap shekken kásipkerler bolsa, bizge habarlasýyn suraımyz», - deıdi Petropavl qalalyq Polıtsııa basqarmasy tergeý bóliminiń basshysy Nurjan Omarov.
