Petropavlda búginnen bastap tótenshe jaǵdaı rejımi engizildi

PETROPAVL. QazAqparat – Petropavlda búginnen bastap jergilikti aýqymda tehnogendik sıpattaǵy tótenshe jaǵdaı rejımi engizildi, dep habarlaıdy QazAqparat tilshisi.

Tótenshe jaǵdaı rejımin engizýge Petropavlda 7 mamyr kúni tutanǵan órt sebep boldy.

Esterińizge salaıyq, «Bereke» yqshamaýdanynda qamys janyp, qatty jeldiń saldarynan arty aýqymdy órtke ulasty.

Saldarynan 9 jeke turǵyn úı kúlge aınalyp, taǵy ekeýine zaqym kelgen edi.

Petropavl qalalyq ákimdigi úıleri janyp ketken jeti otbasynyń jaldamaly páterge ornalastyrylǵanyn aıtty.

Taǵy tórteýine yńǵaıly baspana izdestirilip jatyr. Páterler demeýshilerdiń qarajatyna jalǵa alynǵan.

Zardap shekkenderge kómek kórsetý úshin qala turǵyndary da atsalysyp jatyr.

Petropavldaǵy qalalyq mádenıet úıinde ashylǵan gýmanıtarlyq pýnktke tez búlinbeıtin azyq-túlikti, kıim-keshekti, jeke gıgıenalyq quraldardy apardy.

Al tótenshe jaǵdaı rejımi dalada qalǵan otbasylarǵa QR zańnamasy aıasynda keltirilgen shyǵyndy qysqa merzimde óteý úshin engizilip otyr.

Endi táýelsiz sarapshylardyń baǵalaýynan keıin, zardap shekkenderge ótemaqy tólene bastaıdy.

Sondaı-aq baspana ıelerine 100 AEK mólsherinde ótemaqy da berilmek.