Petropavlda búginnen bastap kópqabatty úılerge jylý berilmeıdi

PETROPAVL. QazAqparat – Petropavlda 16 sáýirden bastap jylytý maýsymy aıaqtaldy, nysandar jylýdan kezeń-kezeńimen ajyratylmaq, dep habarlaıdy QazAqparat tilshisi.

Bul týraly Petropavl ákimi Bolat Jumabekov áleýmettik jelidegi óz paraqshasynda jazdy.

«Búgin jylytý maýsymyn aıaqtaý týraly qaýlyǵa qol qoıdym. Ajyratý protsesi 8-10 kúnge sozylady. Eń sońynda mektepter, balabaqshalar men aýrýhanalar jylýdan ajyratylady», - dedi qala ákimi.

Turǵyndar bul sheshimge qoldaý bildirip jatyr.

Olardyń pikirinshe, jylytý maýsymyn aıaqtaý arqyly Petropavldaǵy jylý-elektr ortalyǵynda jóndeý jumystaryn erterek bastaýǵa múmkindik bolady.

Óıtkeni bıyl jylytý ortalyǵynda birneshe ret apat bolyp, petropavldyqtar qysta jylýsyz otyrǵan edi.

Sońǵy ret kásiporynnyń tútin murjasy qulaǵanda bir jumysshy úıindi astynda qalyp qaza tapty.