Petropavlda birneshe adamǵa úlken shyǵyn keltirgen alaıaq áıel sottaldy

PETROPAVL. KAZINFORM – Petropavlda eshqaıda jumys istemeıtin áıel birneshe jyl boıy tanystaryn aldap, solardyń esebinen kún kórip kelgen. Tergeý barysynda alaıaqtyqtyń 10 epızody anyqtaldy.

Soltústik Qazaqstan oblysy polıtsııa departamenti baspasóz qyzmetiniń málimetinshe, 30 jastaǵy áıel túrli sebepterdi syltaý etip qaryzǵa aqsha surap kelgen, ári ózin tabysty kásipker retinde tanystyrǵan. 2019 jyly kelinshek jábirlenýshilerdiń birin sendirip, shuǵyl túrde jyljymaıtyn múlik alamyn dep aqsha surap alǵan. Aldanyp qalatynyn bilmegen áıel páterin kepilge qoıyp, iri somada nesıe alady. Saldarynan 12 mln teńge shyǵyn shekti.

Petropavl qalasynyń polıtsııa basqarmasynyń tergeýshileri kúdiktiniń qylmystyq áreketin tergeý barysynda 45 myń teńgeden birneshe mıllıondaǵan teńgege deıin shyǵyn keltirilgen alaıaqtyqtyń 10 epızodyn anyqtady. Jábirlenýshilerdiń kópshiligi oǵan senip, qansha jyl ótse de bergen qaryzdary qaıtarylady dep oılaǵan. Polıtsııaǵa tek tórteýi ǵana júgingen.

Ózgelerdiń aqshasyna kún kórýdi ádetke aınaldyrǵan áıel 2023 jyldyń kókteminde kondıterlik ónimder men jıdekterden quralǵan gúl shoqtaryn satý týraly habarlandyrýlardy ınternet keńistiginde ornalastyra bastaǵan. Klıentterdiń birine tapsyrysqa saı kelmeıtin tátti gúl shoǵyn jibergen. Endi bir adam aqshasy tólenip, ýáde etken taýardy múldem almaǵan. Osylaısha taǵylǵan aıypqa ınternet alaıaqtyqtyń eki epızody qosyldy.

Bıyl naýryzda Petropavl qalalyq soty alaıaq áıeldi 4 jylǵa bas bostandyǵynan aıyrý túrinde jaza taǵaıyndap, keltirilgen shyǵyndy óteýge mindettedi. Úkim zańdy kúshine endi.