Petropavlda bir jataqhanada turǵan 14 stýdentten temiretki anyqtaldy
ASTANA. KAZINFORM — Petropavl qalasyndaǵy Maǵjan Jumabaev atyndaǵy joǵary kolledjde dene terisiniń dermatofıtııasyn juqtyrǵan 14 stýdent tirkeldi. Olardyń barlyǵynda ınfektsııa zerthanalyq taldaý arqyly rastalǵan, dep habarlaıdy Kazinform tilshisi.
Soltústik Qazaqstan oblysynyń sanıtarııalyq-epıdemıologııalyq baqylaý departamentiniń málimetinshe, epıdemıologııalyq tekserý barysynda naýqastardyń bir jataqhananyń bir qabatynda, kórshiles bólmelerde turǵany anyqtaldy. Sondaı-aq olar turmystyq baılanysta bolǵan.
Mamandar ınfektsııany alǵash juqtyrǵan stýdent baılanysta bolǵan yqtımal ınfektsııa kózin de anyqtady.
— Aýrýdyń odan ári taralýyna jol bermeý úshin stýdentter turatyn jáne oqıtyn oryndarda epıdemııaǵa qarsy jáne profılaktıkalyq sharalar júrgizildi. Atap aıtqanda, qorytyndy dezınfektsııa jasalyp, naýqastar medıtsınalyq baqylaýǵa alyndy. Tekserý nátıjesinde ákimshilik sharalar qabyldanyp, aıyppul salyndy. Qazirgi ýaqytta jaǵdaı departamenttiń baqylaýynda, — delingen habarlamada.
Vedomstvo ókilderi dermatomıkozdyń aldyn alý úshin jeke gıgıena talaptaryn saqtaýǵa, ózgeniń taraǵyn, kıimin, aıaq kıimi men tósek-ornyn paıdalanbaýǵa keńes beredi. Sondaı-aq qańǵybas janýarlarmen baılanystan aýlaq bolý qajet. Teride nemese bas terisinde bórtpe paıda bolǵan jaǵdaıda dermatologqa qaralý usynylady.
Eske salaıyq, buǵan deıin Petropavlda osy kolledjdiń segiz stýdenti dene dermatofıtııasyna kúdikpen aýrýhanaǵa jatqyzylǵany habarlanǵan bolatyn.
