Petropavlda bir táýlikte eki bala joǵarydan qulap ketti
PETROPAVL. KAZINFORM – Petropavldaǵy saýda-oıyn-saýyq ortalyqtarynyń birinde 8 jasar bala eskalatordan qulap mertikse, bes jasar búldirshin turǵyn úıdiń úshinshi qabatynan qulap jaraqattandy.
Áleýmettik jelide balanyń eskalatordan qulaǵan sáti jarııalandy. Onyń janynda eresekter bolmaǵan.
Soltústik Qazaqstan oblysy polıtsııa departamenti baspasóz qyzmetiniń málimetinshe, oqıǵa 27 tamyz kúni bolǵan, bala túrli dene jaraqatyn aldy.
Qazirgi ýaqytta bolǵan oqıǵanyń mán-jaıy anyqtalyp, saýda-oıyn-saýyq ortalyǵyndaǵy qaýipsizdik sharalary zerttelip jatyr. Tekserý nátıjeleri boıynsha protsessýaldyq sheshim qabyldanyp, aldyn alý sharalary júrgiziledi.
Kámeletke tolmaǵan balanyń qaýipsizdigin tıisti deńgeıde qamtamasyz etpegeni úshin ata-anany jaýapkershilikke tartý máselesi qarastyrylady.
Polıtseıler sondaı-aq joǵary qabattan qulaǵan balaǵa qatysty tekserýdi bastady.
28 tamyz kúni Petropavlda 5 jasar bala úshinshi qabattan qulap ketken. Aldyn ala málimet boıynsha, búldirshin moskıt toryna súıengen. Birden aýrýhanaǵa jetkizildi.
Atalǵan fakt boıynsha qylmystyq is qozǵalyp, tergeý amaldary júrgizilip jatyr.
Buǵan deıin Astanada 3 jasar bala terezeden qulap mert bolǵanyn jazǵan edik.