Petropavlda bir kúnde eki saıajaı qoǵamdastyǵynda órt shyqty

PETROPAVL. KAZINFORM – Petropavlda órt sóndirýshiler saıajaı qoǵamdastyǵynda shyqqan órtti órshitpeı, der kezinde sóndirdi.

Ótken demalys kúni Petropavldaǵy saıajaı qoǵamdastyqtarynda eki órt tirkeldi. 

Soltústik Qazaqstan oblysy Tótenshe jaǵdaılar departamenti baspasóz qyzmetiniń málimetinshe, 13 sáýir kúni saǵat 13.15 mınýt ketkende «Kırovets-2» saıajaı qoǵamdastyǵynyń mańyndaǵy qoqys pen kepken shóp janǵandyǵy týraly habar túsken. Jalyn sol jerdegi ıesiz turǵan, jartylaı buzylǵan ǵımaratqa aýysqan. Órt shamamen 1 gektar ashyq aýmaqty qamtyp, saıajaı ýchaskelerine qaýip tóndirdi.

Órt sóndirýshilerdiń jedel áreketi arqasynda jalynnyńbasqa turǵyn úı qurylystaryna taralýyna jol berilgen joq. 

Dál sol kúni saǵat 15.33-te «Gorızont» saıajaı qoǵamdastyǵynda da órt shyqqandyǵy týraly habar tústi. Ýchaskedegi eki qabatty úıdiń ekinshi qabaty tolyq janyp ketti, birinshi qabatyna jáne qasyndaǵy 140 sharshy metrlik qurylystyń tóbesine zaqym keldi. Órt tek keshki saǵat 19.30 shamasynda ǵana tolyq sóndirildi. Zardap shekkender joq. 

Buǵan deıin Shyǵys Qazaqstanda kún jylynǵandyqtan dala órti kúrt kóbeıgenin jazǵan edik.