Petropavlda bir kúnde 950 turǵynnan ótemaqyǵa ótinish tústi

PETROPAVL. KAZINFORM — Petropavlda sý tasqynynan zardap shekkenderden ótinish qabyldanyp jatyr. Ázirge turǵyndar bir rettik kómek qana ala alady.

Petropavl qalalyq ákimdiginiń málimetinshe, 16 sáýir kúni sý tasqynynan zardap shekkenderden 950-den astam ótinish túsken.

Osylaısha eki baǵyt boıynsha — birrettik kómek jáne materıaldyq shyǵynnyń ornyn toltyrýǵa arnalǵan ótemaqyǵa 1949 ótinish qabyldandy.

Budan bólek Petropavldyń 97 turǵyny nesıeleriniń qaıtarym merzimin shegerýdi suraǵan. 

«Búgin tańerteńnen beri taǵy 138 adam shyǵynnyń ornyn toltyrýǵa, 139-y — birrettik tólem alýǵa jáne 10 turǵyn nesıe tóleý ýaqytyn keıinge qaldyrýǵa ótinish berip ketti. Jumys júrip jatyr. Ótinishti Petropavlda Teatr kóshesi, 36 mekenjaıyna kelip jazýǵa bolady. Halyqqa qyzmet kórsetý ortalyǵynyń, banktterdiń mamandary bir jerde otyr. Jumys ýaqyty tańǵy saǵat 9.00-den 18.30-ǵa deıin», — deıdi Petropavl qalalyq jumyspen qamtý jáne áleýmettik baǵdarlamalar bóliminiń basshysy Danııar Asylbekov. 

Buǵan deıin SQO-da sý tasqynynyń ekinshi tolqyny bastalǵanyn aıtqan edik.