Petropavlda bir ǵımarat qyzyl túspen jaryqtandyrylmaq
PETROPAVL. KAZINFORM – Qazaqstanda týberkýlezge qarsy kúres aılyǵy bastaldy. Bıyl ol «Biz týberkýlezdi jeńe alamyz!» uranymen ótip jatyr.
24 naýryz – Dúnıejúzilik týberkýlezge qarsy kúres kúni. Soltústik Qazaqstan oblystyq ftızıopýlmonologııa ortalyǵynyń málimetinshe, qazirgi ýaqytta bul aýrý jahandyq problema bolyp otyr. Epıdemııany joıý úshin 2023 jyly BUU-nyń týberkýlez boıynsha joǵary deńgeıdegi kezdesýinde qabyldanǵan mindettemelerdi júzege asyrý qajet.
«24 aqpanda Qazaqstanda týberkýlez boıynsha aılyq bastaldy, ol Dúnıejúzilik týberkýlezge qarsy kúres kúnine oraılastyrylǵan. Jylyna bir ret ótkiziletin bul is-sharanyń maqsaty halyqty qaipti aýrý týraly habardar etý. Respýblıkalyq kórsetkishpen salystyratyn bolsaq, ókinishke oraı SQO-da týberkýlezben aýrýshańdyq kórsetkishi joǵary», - deıdi SQO ftızıopýlmonologııa ortalyǵy konsýltatıvtik-dıagnostıkalyq bólim meńgerýshisi Kenjegúl Áripova.
Oblystyq ftızıopýlmonologııa ortalyǵynda 2 jáne 16 naýryzda «Ashyq esik» kúnderi ótedi, bul kúni turǵyndar flıýorografııalyq zertteýden óte alady jáne shaǵym bolǵan jaǵdaıda ftızıatr-dárigerge júginip, taldaýlar tapsyra alady.
13 naýryzda Petropavldaǵy «Altyn Arman» saýda ortalyǵynda ortalyq qyzmetkerleri flesh-mob uıymdastyryp, sondaı-aq saýda ortalyǵynyń aýmaǵynda jyljymaly flıýorograf ornatylady, onda árbir kelýshi flıýorografııalyq zertteýden óte alady.
«Sońǵy segiz jyl boıy búkil álemde 24 naýryzda DDU-nyń bastamasymen «Týberkýlezden álemdi jaryqtandyr» halyqaralyq naýqany júrgizilip keledi. Aktsııa barysynda týberkýlezben kúresti qoldaý maqsatynda qalanyń kórikti jerleri qyzyl túspen jaryqtandyrylady.
Petropavl bul aktsııaǵa 2020 jyldan bastap qatysyp keledi, buǵan deıin «Abylaı han rezıdentsııasy mýzeı-kesheni, oblystyq beıneleý óneri mýzeıi, astrofızıkalyq observatorııa, Soltústik Qazaqstan ýnıversıteti, oblystyq tarıhı-ólketaný mýzeıi jaryqtandyryldy.
Bıyl oblystyq fılarmonııa ǵımaratyn qyzyl túspen jaryqtandyrý josparlanǵan. Aktsııa 24 naýryzda saǵat 20:00-den 21:00-ge deıin ótedi», - deıdi Kenjegúl Áripova.
