Petropavlda «Bir aýyl – bir ónim» jobasy aıasynda kórme ótip jatyr
PETROPAVL. KAZINFORM – Soltústik Qazaqstan oblysynda bıyl 24 taýar óndirýshi «Bir aýyl - bir ónim» jobasyna qatysyp, óz ónimderin saıysqa usyndy.
SQO Kásipkerler palatasy baspasóz qyzmetiniń málimetinshe, «Bir aýyl - bir ónim» baıqaýy «Men kásipker» jobasy aıasynda qolǵa alynǵan. Ol jergilikti shıkizatty qoldaný arqyly shyǵarylatyn ónimdi kópshilikke tanystyrýǵa baǵyttalǵan jáne kem degende básekege qabiletti bir ónimniń óndirisin damytýdy maqsat etken. Bul ıdeıa Japonııadan alynǵan.
Kórme-jármeńke Petropavldaǵy saýda oryndarynyń birinde ótip jatyr.
SQO Kásipkerler palatasynyń dırektory Esjan Orazalınniń aıtýynsha, is-sharanyń basty maqsaty biregeı óńirlik ónimdi tabý jáne jergilikti brend qurý.
«Bir aýyl - bir ónim» jobasynyń maqsaty – óńirlerdi damytý, halyqtyń ál-aýqatyn jaqsartý, básekege qabiletti, sapaly ónim óndirýde kásipkerlerdi qoldaý, halyqty biregeı óńirlik ónim jasaýǵa tartý. Byltyr osy jobaǵa oblystyń 16 óndirýshisi qatyssa, búgingi jármeńkede 24 kásipker óz ónimderin usyndy. Munyń ishinde Petropavl turǵyndarymen qosa, aýyldyqtar da bar. Olar sút, et, bal, nan-toqash, kondıterlik ónimder, ulttyq úlgidegi kıim jáne toqyma buıymdary, aǵashtan jasalǵan buıymdar, kádesyı ónimderi jáne t.b. óndiredi», - dedi Esjan Orazalın.
Búgingi kórmeniń qorytyndysy boıynsha jobanyń ekinshi kezeńine ótetin on qatysýshy irikteledi. Budan ári olardyń arasynda brend-komıtettiń sheshimimen óńirlik týrdyń úsh jeńimpazy tańdalady, olar óz ónimderin «Bir aýyl – bir ónim» respýblıkalyq kórmesinde usynýǵa múmkindik alady.
Buǵan deıin SQO-da bıyl 660 adam rýlde mas kúıde ustalǵanyn jazǵan edik.
