Petropavlda bir aptada eki bala kópqabatty úıdiń terezesinen qulap ketti
PETROPAVL. KAZINFORM – Bıikten qulaǵan eki bala da aman, qazir medıtsınalyq mekemede tıisti em alyp jatyr.
Soltústik Qazaqstan oblystyq Polıtsııa departamenti baspasóz qyzmetiniń málimetinshe, alǵashqy oqıǵa 23 shilde kúni Petropavldaǵy Gorkıı kóshesindegi turǵyn úılerdiń birinde boldy. Tórt jasar ul bala úshinshi qabattaǵy páterdiń terezesinen qulaǵan. Jaraqattanǵan búldirshin shuǵyl túrde emdeý mekemesine jetkizilip, oǵan qajetti medıtsınalyq kómek kórsetilip jatyr.
Quqyq qorǵaý organdary oqıǵanyń barlyq mán-jaıyn anyqtap, tekserý qorytyndysy boıynsha qoldanystaǵy zańnamaǵa sáıkes quqyqtyq baǵa beriletinin habarlady.
Ekinshi oqıǵa 25 shilde kúni Petropavldaǵy Nazarbaev kóshesinde ornalasqan kópqabatty turǵyn úıde tirkeldi. Munda kámeletke tolmaǵan qyz bala besinshi qabattaǵy páterdiń terezesinen qulaǵan.
Oqıǵadan keıin bala oblystyq balalar aýrýhanasyna jatqyzyldy. Qazirgi ýaqytta polıtsııa qyzmetkerleri bolǵan jaǵdaıdyń sebepterin anyqtap jatyr.
- Tekserý nátıjesi boıynsha zańnama talaptaryna sáıkes protsessýaldyq sheshim qabyldanady. Kámeletke tolmaǵan balanyń quqyqtaryn qorǵaý maqsatynda jáne tekserý aıaqtalǵanǵa deıin ózge málimetter jarııalanbaıdy, - deıdi tártip saqshylary.
Mamandar ata-analar men zańdy ókilderdi balalardyń qaýipsizdigine erekshe nazar aýdarýǵa shaqyrady. Ásirese jaz mezgilinde ashyq tereza mańynda balalardy qaraýsyz qaldyrmaý, terezelerge arnaıy qorǵanysh qurylǵylaryn ornatý jáne tereze mańyna balalar shyǵyp ketýi múmkin jıhazdardy qoımaý mańyzdy ekenin eske salady.
Buǵan deıin Atyraýda jyl basynan beri 20 bala terezeden qulaǵanyn jazǵan edik.
