Petropavlda bokstan burynǵy álem chempıonymen jattyǵý ótti
PETROPAVL. QazAqparat - Petropavldyń basty alańynda bokstan burynǵy álem chempıony Janat Jaqııanov barlyq qatysam deýshilerge jattyǵý ótkizdi, dep habarlaıdy QazAqparat tilshisi.
Jalpyǵa ortaq jattyǵýǵa qalanyń júzdegen turǵyndary kelip qatysty. Janat Jaqııanov halyqqa jattyǵý jasatyp, óziniń jankúıerlerimen sýretke tústi. Ul balalar tanymal jerlesterine tamsana qarap, boksshynyń kórsetken qarapaıym jattyǵýlaryn aına qatesiz oryndaýǵa tyrysty.
«Jerlesterimniń salaýatty ómir saltyn tańdaǵandaryna rızamyn. Bul sharaǵa qatysqanyma óte qýanyshtymyn. Men tańerteń uıqydan turǵan soń jasaýǵa bolatyn asa qıyn emes jattyǵýlardy kórsettim. Barlyǵyn belsendi túrde sportpen aınalysýǵa shaqyramyn», - dedi boksshy.
Sporttyq is-shara fıtnes-jattyqtyrýshylardyń sheberlik sabaqtaryna ulasty.
