Petropavlda boksta turǵan kólik órtenip, bir adam aýrýhanaǵa tústi
PETROPAVL. QazAqparat – Petropavlda óndiristik kooperatıvtiń boksynda turǵan jeńil kólikte órt shyǵyp, er adamdy kúıik shaldy, dep habarlaıdy QazAqparat tilshisi.
Soltústik Qazaqstan oblysy Tótenshe jaǵdaılar departamenti baspasóz qyzmetiniń málimetinshe, 8 jeltoqsan kúni saǵat 20.36-da «101» telefon nómirine órt jaıynda habarlama túsken. Habarlasqan adam Petropavldaǵy Ryjov, 134 mekenjaıynda ornalasqan óndiristik kooperatıv boksynda turǵan Aýdı-80 markaly jeńil kóliktiń janyp jatqanyn aıtqan.
Órt sóndirýshiler № 2 shaqyrtý boıynsha kóterilip, birden oqıǵa ornyna jetken. Mamandar kelgen kezde nysanda turǵan kólik jalyndap janyp jatqan.
Órt saldarynan 62 jastaǵy er adam 1-2 dárejeli kúıik jaraqatyn aldy. Zardap shegýshiniń qoly, betiniń 5 % kúıgen. Ol jedel járdem qyzmetimen Petropavldaǵy 3-qalalyq aýrýhanaǵa, jaq-bet hırýrgııasy bólimshesine jetkizilip, jatqyzyldy. Jaǵdaıy – ortasha.
Oqıǵa ornynda Petropavldaǵy órt bólimsheleriniń 7 arnaıy tehnıkasy, jeke quramnan 20 adam jumys istedi. Jeńil kólik tolyq janyp ketti. Al nysandy mamandar saqtap qala aldy. Saǵat 21.06-da órt tolyq sóndirildi.
Mamandardyń aıtýynsha, órttiń shyǵýyna mashınanyń qozǵaltqysh bóliginde bolǵan qysqa tuıyqtalý sebep. Shyǵyn mólsheri anyqtalatyn bolady.
