Petropavlda boks ardagerleri arasynda halyqaralyq ashyq týrnır ótip jatyr
PETROPAVL. KAZINFORM – QR Konstıtýtsııa kúni qarsańynda Petropavlda dástúrli «Rıng koroli» týrnıri bastaldy. Halyqaralyq jarystyń ereksheligi – oǵan jasy otyzdan asqandar ǵana qatysa alady.
Bıyl jetinshi ret uıymdastyrylyp otyrǵan bul týrnırdiń Qazaqstanda teńdesi joq. Sońǵy jyldary onyń tanymaldyǵy artyp keledi. Bıyl alys shet elderden de bylǵary qolǵap sheberleri qatysýǵa tilek bildirgen.
Máselen, «Rıng koroli» ataǵyn ıelený úshin Izraıl memleketiniń sport ardageri Mıhael Edı qatysyp jatyr. Onyń jasy 64-te. Ashyq týrnır jaıynda ınternetten kórip, qatysý úshin Petropavlǵa arnaıy kelip otyr.
Kemerevo qalasynan kelgen Sergeı Tannagashev — bokstan Reseıdiń sport sheberi. Bul týrnırge qatysýǵa bıyl da kelip otyr. Myqty sportshylardyń biri sanalatyn ol birneshe ret fınalǵa shyqty. Absolıýtti salmaq dárejesinde óner kórsetetin bylǵary qolǵap sheberi bıyl bas júldeni jeńip alýǵa nıetti.
«Rıng koroli» týrnırine qatysýshylardyń biri - byltyrǵy kúmis júldeger Zınat Jandybaev. Halyqaralyq deńgeıdegi sport sheberi, sondaı aq áskerı qyzmetshiler arasynda ótken Álem chempıonatynyń eki dúrkin chempıony. 44 jastaǵy sportshy qazir negizinen balalardy jattyqtyrýmen aınalysady. Petropavlǵa shaqyrtýmen keldi.
Qatysýshylar arasynda Qyrǵyzstan men Ózbekstannyń boks ardagerleri de bar, biraq basym bóligi – Astana, Almaty, Atyraý, Aqtaý qalalarynyń jáne Qazaqstannyń basqa óńirleriniń bylǵary qolǵap sheberleri. Olar 63, 69, 75, 91 jáne +91 keli salmaq dárejesinde kúsh synasady. Jekpe-jek eki mınýttan turatyn úsh raýndta ótedi.
«Rıng koroli-2024» ataǵy úshin fınaldyq kezdesýler 30 tamyzda Kamıl Safın atyndaǵy balalar men jasóspirimderdiń boks mektebiniń zalynda ótedi.
Buǵan deıin Dúnıejúzilik kóshpendiler oıynynyń ashylý rásimine barlyq bılet satylyp ketkenin jazǵan edik.
