Petropavlda blokpostardan kimder óte alady
PETROPAVL. QazAqparat – 9 qarashadan bastap Petropavl qalasy karantınǵa jabylady. Qalalyq ákimdikte blokpostardan kimder jáne qaı jaǵdaıda óte alatyny jaıyn túsindirdi, dep habarlaıdy QazAqparat tilshisi.
Petropavl ákiminiń baspasóz qyzmeti bergen málimetke sáıkes, qalaǵa blokpostar arqyly aýdandyq ákimdikter usynǵan tizimder boıynsha jumysqa jol júrgen azamattar ótkiziledi.
Sondaı-aq, medıtsınalyq jaǵdaıǵa baılanysty jol júrgen azamattar qalaǵa kirip-shyǵa alady. Bul jaǵdaıda olardyń qolynda medıtsınalyq mekemeden berilgen arnaıy joldama nemese anyqtama bolýy tıis.
Blokposttardan turǵyndardyń ómir tirshiligin qamtamasyz etý kásiporyndary men uıymdardyń qyzmetkerleri, apattyq-qutqarý qyzmeti jáne jedel medıtsınalyq kómek kórsetý kólikteri, tabıǵatty qorǵaý jáne veterınarlyq, jol jóndeý jumystaryna qatysty is-sharalarǵa jumyldyrylǵan mamandar, sanıtarlyq-epıdemıologııalyq qyzmet kórsetý mamandary, birinshi qajettiliktegi taýarlar, azyq-túlik, dári-dármek, qatty, suıyq otyn jáne janar-jaǵarmaı jetkizýshiler kedergisiz óte alady. Barlyq málimetter «Sergek» bazasyna engizilýi tıis.
Qalǵan azamattar Petropavlǵa koronavırýsqa tapsyrǵan testiniń qorytyndysy teris bolǵanyn dáleldeıtin anyqtamamen ǵana kire alady. Ol úsh táýlikke deıin jaramdy. Anyqtama bes jasqa deıingi balalarǵa ǵana qajet emes.
Karantın kezinde Petropavl men oblys aýdandary arasyndaǵy jolaýshylar tasymaly men avtovokzal qyzmeti toqtatyldy.
Eske sala ketsek, koronavırýs juqtyrǵan adamdar sanynyń kóbeıýine baılanysty 9 qarashadan bastap Petropavl qalasy men Qyzyljar aýdany karantınǵa jabyldy.
