Petropavlda bıyl «Jaýjúrek polk» sherýi onlaın ótedi

PETROPAVL. QazAqparat – Petropavlda bıyl «Jaýjúrek polk» sherýi turǵyndardyń ótinishine qaramastan tek onlaın ótetin boldy, dep habarlaıdy QazAqparat tilshisi.

Petropavl qalalyq ákimdiginiń málimetinshe, Jeńis merekesi oblys ortalyǵynda keń kólemde atap ótiledi.

Búginde baǵdarlama bekitilgen. Uly Otan soǵysy ardagerleriniń eshqaısysy umyt qalmaıdy.

Bul kúnderi Petropavldyń mektepterinde arnaıy synyp saǵattary jáne áskerı-patrıottyq is-sharalary ótip jatyr.

Al meıram kúni maıdangerler turatyn úılerdiń aýlalarynda kontserttik baǵdarlama uıymdastyrylady.

Qalalyq ákimdik kóptiń kókeıinde júrgen «Jaýjúrek polk» sherýin ótkizý týraly máseleniń de basyn ashty.

«Bıyl «Jaýjúrek polk» sherýi aktsııasy el boıynsha onlaın ótedi. Ony respýblıkalyq portaldardyń birinen onlaın-rejımde tamashalaýǵa bolady. Bul format kórshi eldegi geosaıası jaǵdaıǵa baılanysty jáne qatysýshylardyń qaýipsizdigin qamtamasyz etý maqsatynda tańdalyp alyndy.

Al turǵyndarǵa týǵan-týystarynyń fotolaryn alyp eske alý oryndaryna – máńgilik alaý, eskertkishterdiń basyna barýǵa eshkim kedergi bolmaıdy», - delingen habarlamada.

Esterińizge salaıyq, Soltústik Qazaqstan oblysynda bıyl 15 soǵys ardageri Jeńis merekesin qarsy almaq.