Petropavlda bıyl jasóspirimderge qatysty jynystyq sıpattaǵy 7 qylmys jasalǵan
Petropavlda ótken mundaı jıyndardyń maqsaty - jasóspirimder arasyndaǵy jáne olarǵa qatysty jasalatyn qylmystardyń aldyn alý. Oǵan sebep te joq emes.
«Petropavlda jyl basynan beri kámelet jasyna tolmaǵandarǵa qatysty 15 qylmys tirkelse, sonyń 7-i – jynystyq sıpattaǵy zorlyq-zombylyq. Byltyr osy aralyqta 20 qylmys jasalsa, sonyń 11-i jasóspirimderge qatysty jynystyq qylmys. Buǵan zorlaý da, kelisim boıynsha bolǵan qatynas ta jatady», - deıdi Petropavl qalalyq ıývenaldy polıtsııa bóliminiń aǵa ýchaskelik ınspektory Lıdııa Sýltangeldınova.
Mamandar oblystyń mektepterin, kolledjderin aralap, balalarmen, ata-analarmen semınarlar ótkizip jatyr. SQO shtattan tys balalar jáne jasóspirimder gınekology Qýanysh Qoıshyǵuldyń aıtýynsha, qazirgi ýaqytta balalar fızıkalyq, psıho-emotsınaldyq jaǵynan erte jetiletin bolǵan. Sondyqtan, bul kezdesýlerdiń mańyzy zor.
«Erte jynystyq qatynasqa túsý, erte júktilik máselesi búginde ózekti. 14 jastan bastap jynystyq qatynasqa túsetin balalar kóp. Bizdiń maqsatymyz osyndaı kezdesýler arqyly onyń zardaby jaıynda aıtý. Onyń birinshisi – josparlanbaǵan júktilik, saldary retinde sońy ólimge ákelýi múmkin krımınaldy jasandy túsikti aıtýǵa bolady.
Ekinshisi – ınfektsııalyq aýrýlar. Sońǵy kezde balalar arasynda ony anyqtaý kórsetkishi joǵary. Kontratseptsııa qoldanylmaıdy. Sondyqtan mektepterdi aralap, balalarmen kezdesip, aqparat bermekshimiz.
Búginde jigitter 15 jastaǵy qyzdy 20-daǵy boıjetkenmen shatastyryp jatady. Al onyń saldary - erte júktilik, psıhologııalyq qysym, sýıtsıd jáne krımınaldy túsik. Kezdesýlerde jas kezden saqtaný kerektigi jaıynda aıtyp jatyrmyz», - deıdi Qýanysh Qoıshyǵul.
Byltyr, óńir prokýrorlarynyń aıtýynsha, SQO-da jasóspirimderge qatysty 67 qylmys tirkeldi, 13 fakti - balalardyń jynystyq qol suqpaýshylyǵyna qatysty. Al 21-in kámelet jasyna tolmaǵandardyń ózderi jasaǵan.
