Petropavlda bıyl otbasynda janjal shyǵarǵan myńnan astam adam jaýapqa tartyldy
Soltústik Qazaqstan oblysy polıtsııa departamenti baspasóz qyzmetiniń málimetinshe, qańtar aıynda spırttik ishimdik ishilgen otyrys barysynda 59 jastaǵy Petropavl turǵyny áıelin pyshaqtap tastaǵan. Áıel tiri qaldy.
Aqpanda sot probatsııalyq baqylaý bekitip, buzaqynyń 4 jylǵa bas bostandyǵyn shektedi. Sondaı-aq, alkogoldik ishimdik ishýge jáne spırttik ishimdikter satatyn kóńil kóterý oryndaryna barýǵa tyıym saldy.
Alaıda er adam jarty jyl ishinde qoıylǵan talaptardy birneshe ret buzdy. Endi ol jazasynyń ótelmegen merzimin túrmede ótkizedi. Petropavl turǵynynyń bas bostandyǵyn shekteý jazasy bas bostandyǵynan aıyrý jazasyna aýystyryldy.
Er adam buǵan deıin de birneshe ákimshilik jaýapqa buzaqylyq, tynyshtyqty buzý jáne abattandyrý qaǵıdasyn buzý boıynsha tartylǵan eken.
«Turmystyq zorlyq-zombylyq – búgingi kúniń ózekti máseleleriniń biri. Zorlyq-zombylyqtyń qurbandary úıdegi daý-janjaldy syrtqa shyǵarǵysy kelmeı, keshirip jatady. Alaıda, tájirıbe kórsetkendeı, mundaı qarym-qatynastyń saldary keıin aýyr bolýy múmkin.
Jyl basynan Petropavlda otbasylyq-turmystyq qatynastar salasynda quqyq buzýshylyq jasaǵany úshin 1092 adam jaýapqa tartyldy. Budan basqa 18 qylmys jasalǵan, onyń 13-i alkogoldik mas kúıde. Basym bóligi túrli dárejedegi dene jaraqattaryn keltirý.
Turmystyq zorlyq-zombylyq qurbandaryna óz problemalary týraly úndemeı qalmaýǵa keńes beremiz. 8 (7152) 49-31-58 jáne 8 (7152) 61-25-30 telefondary arqyly polıtsııaǵa, óz ýchaskelik polıtsııa ınspektoryńyzǵa, 150 respýblıkalyq sall-ortalyǵyna, +7-777-504-77-73 Áıelderdi qoldaý ortalyǵyna nemese «102» arnasyna habarlańyzdar, jaǵdaıdyń ýshyǵýyna jol bermeńizder», - deıdi Petropavl qalalyq PB JPQ bólimi bastyǵynyń orynbasary Aıdyn Aqmaǵambetov.