Petropavlda bıyl memleket menshigine qaıtarylýy tıis 170 ýchaske anyqtaldy
Petropavl ákimi Rýslan Ańbaev óńirlik kommýnıkatsııalar qyzmetinde Petropavl qalasynyń áleýmettik-ekonomıkalyq damýy boıynsha qorytyndylar men perspektıvalyq josparlary taqyrybynda brıfıng ótkizdi.
Ákim kótergen ózekti máselelerdiń biri – jer ýchaskelerin qaıtarýǵa baılanysty. Bıyl memleket menshigine qaıtarylýy tıis 170 ýchaske anyqtalǵan. Sonyń 74-i - zańdy buza otyryp berilgen, 35-in - turǵyndar óz erkimen ıemdenip alǵan jáne 61 jer ýchaskesi uzaq ýaqyt boıy maqsatty túrde paıdalanylmaǵan.
«173 baý-baqsha seriktestiginde de ýchaskelerdi paıdalanbaý faktileri bar ekenin atap ótkim keledi. Máselen, «Petropavl qalasynyń baǵbandary» qoǵamdyq birlestiginiń málimeti boıynsha, qalada baý-baqsha ósirýge arnalǵan 47 myń jer ýchaskesi bar. Sonyń 17,9 myńy qaraýsyz qalǵan. Al qala turǵyndary arasynda saıajaıdan jer ýchaskelerin alǵysy keletinder sany jetip artylady», - dedi Rýslan Ańbaev.
Tekserý qorytyndysy boıynsha bıyl 122 ýchaske memleket menshigine qaıtaryldy jáne turǵyndarǵa berildi. Sottyń qaraýynda 12 materıal jatyr, 404 ýchaske ıesi joq jyljymaıtyn múlik retinde esepke qoıyldy. Ol jer bir jyl merzim ótkennen keıin kommýnaldyq menshikke qaıtarý rásiminen ótedi.
«Budan basqa, biz oblystyń jer ınspektsııasymen birlesip saıajaı ýchaskelerin maqsatsyz paıdalanýǵa tekserý júrgizýdi josparlap otyrmyz. Mundaı faktiler anyqtalǵan jaǵdaıda, osy ýchaskelerdiń ıeleri ákimshilik jaýapqa tartylady. Al saıajaı ýchaskesin alý úshin Petropavl qalasy ákimdiginiń jer qatynastary bólimine júginý qajet», - dedi qala ákimi.
Rýslan Ańbaev ruqsatsyz ornatylǵan garajdar máselesin de kóterdi. Olar ınjenerlik kommýnıkatsııalardyń kúzet-qorǵaý aımaqtarynda óz betinshe ornatylǵandyqtan arnaıy uıymdarǵa jelilerdi ýaqtyly jóndeý jumystaryn júrgizýge jáne avarııalyq jaǵdaılardy joıýǵa kedergi keltiredi.
Bıyl zańsyz qoıylǵan 163 garaj basqa orynǵa kóshirildi. Bul jumys keler jyly da jalǵaspaq.
