Petropavlda bıyl da jaǵymsyz ıis bar
PETROPAVL. QazAqparat – Petropavldaǵy jaǵymsyz ıispen kúresý úshin byltyr bıotoǵanǵa hlorella baldyrlary salyndy. Alaıda bul joba tek keler jyly ǵana nátıje bere bastaıdy, dep habarlaıdy QazAqparat tilshisi.
Kóktem kelip, kún jylynysymen Petropavlda keýdeńdi kerip, keń tynys ala almaısyń. Aýaǵa taraǵan jaǵymsyz ıis qolqany qabady. Mamandardyń aıtýynsha, oǵan qala mańyndaǵy bıotoǵan sebep, keı kúnderi aýaǵa taraǵan kúkirtsýtektiń mólsheri birneshe ese artyp, ol ıis oblys ortalyǵyn alyp ketedi.
Kúlimsi ıisti joıý úshin «Qyzyljar-Sý» JShS «Sýdyń ǵylymı-tehnologııalyq ortalyǵy» JShS-men kelisimge otyryp, byltyr tamyz aıynda bıotoǵanǵa hlorella mıkrobaldyrlaryn saldy. Algolızatsııa nátıjesinde sý qoımasy tazartylmaq.
Bul joba 3 jylǵa shaqtalǵan, sondyqtan tek keler jyly ǵana alǵashqy nátıjesin bere bastamaq.
«Qyzyljar-Sý» JShS málimetinshe, ortalyq tehnologııa men ony iske asyrýǵa qajetti qondyrǵylardy 2023 jyly kásiporynnyń tolyq qoldanysyna beredi. Byltyr bıotoǵanǵa bir mıllılıtrde tyǵyzdyǵy 25 mln jasýsha bolatyn 9 myń lıtr baldyr - Chlorella vulgaris SKO A RKM -0870 quıyldy. Keıin taǵy 4 mln lıtr sýspenzııasy jiberildi.
Bıyl bul jumystar jalǵasyp, bıotoǵandaǵy muz ketpeı turyp, 19 myń lıtr hlorella baldyry jiberildi. Ázirge tıisti normanyń tek 30 %-y ǵana salyndy.
Esterińizge salaıyq, byltyr da Petropavlda aýada jaǵymsyz ıis tarap, turǵyndar tarapynan shaǵym kóbeıgen edi.
