Petropavlda bıyl birneshe mańyzdy nysan paıdalanýǵa beriledi
PETROPAVL. QazAqparat - SQO ákimi Qumar Aqsaqalov Petropavldyń birqatar qurylys nysandaryn aralap, tarıhı-mádenı eskertkishterdi qalpyna keltirý jumystarynyń barysymen tanysty, dep habarlaıdy QazAqparat tilshisi.
SQO ákimi baspasóz qyzmetiniń habarlaýynsha, «Jas Órken» yqsham aýdanynda qurylys qarqyn alyp, jańa úıler, áleýmettik nysandar boı kóterýde. Qazir 500 oryndyq jańa qazaq teatrynyń qurylysy júrip jatyr. Jospar boıynsha mádenıet orny 2020 jyldyń tamyz aıyna deıin salynyp bitýi tıis. Qumar Aqsaqalov mektep salynatyn qurylys alańyna da bardy.
«Qazir oblysta mektepterge suranys joǵary. 2017 jyly 1-synypqa 7600 bala barsa, byltyr 9000 oqýshy mektep tabaldyryǵyn attady. Qazir qalada 1500 orynǵa shaqtalǵan eki mektep salynýda. Bıyl Ýálıhanov kóshesinde taǵy 900 oryndyq mekteptiń qurylysy bastalmaq», - dedi aımaq basshysy.
«Dostyk Mall» saýda, oıyn-saýyq kesheni Petropavlǵa kórik bermek. Jalpy aýmaǵy 27 myń sharshy metr. Ortalyqtyń qarjylyq dırektory Rýslan Áýbákirovtiń sózine qaraǵanda, bir ýaqytta ishine 15 myń adam sııady. 11 býtıkte túrli eldiń ashanasy bolady. Álemge tanymal Býrger Kıng jáne Neıtans fýd kort salasynyń kompanııalary kirmek.
Oblys ákimine Oıqala aýdanyndaǵy Potanın kóshesin qalpyna keltirý boıynsha prezentatsııa jasaldy. Bul aýdandy aspan astyndaǵy murajaı qylyp jasaý ıdeıasy bar.
«Bizge óńirimizdiń tarıhyn dáriptep, damytý kerek. Oıqala aýdanynda aspan astyndaǵy murajaı salý oıymyz bar. Potanın kóshesin murajaıǵa aınaldyramyz. Bul jerde tarıhı stılde úıler, qorshaýlar, shamdar bolady. Kishi sáýlettik formalardy qoıamyz», - dedi oblys ákimi.
Oblys ákimi apatty úılerdiń de turǵyndarymen kezdesti. Petropavlda kóp jyldar boıy apatty úılerdiń máselesi sheshilmeı keldi. Byltyr eski 3 úı buzyldy. Bıyl taǵy 4 apatty úı alynady. 14 jeke úı qulatylady. Turǵyndar baspanaǵa ıe bolady.
«Qazir Petropavlda 17 apatty úı bar. Bul suraqty birtindep sheshemiz. Kelesi jylǵa 5 úıdi buzýdy josparǵa engizemiz. Bul jerde eki kópqabatty úı turǵyzamyz.Osylaısha biz eski úılerdi súrip tastap, qalalyqtardyń turǵyn úı jaǵdaıyn jaqsartamyz, eski úılerdiń ornyna jańa kópqabatty baspana turǵyzamyz. Bir sózben aıtqanda, qalanyń kórkin ózgertip jatyrmyz», - dedi Qumar Aqsaqalov.
